Ақтөбе қаласында Елек және Қарғалы өзендері жағасында орналасқан 60 бау-бақша ұжымының тұрғын үйлерін су басу қаупі бар. Егер былтырғыдай қар тез еріп, су өзен арналарынан асып, тұрғындарға қауіп төндірер болса, адамдарды уақытша орналастыруға 6 эвакуациялық орталық дайындалды. Бұл күндері Песчанка өзенінің жағалауын бекіту жұмыстары жүріп жатыр.
Былтырғы жағдай биыл қайталанбауы үшін өзен сеңдерін бұзу жұмыстары наурыздың алғашқы күндері басталады. ТЖД қызметкерлері Ақтөбе қаласы, Әйтеке би, Байғанин, Ырғыз, Мұғалжар, Ойыл, Хромтау аудандарында далалық өзендерге жарылыс жұмыстарын жүргізеді. Бұл еріген қар суымен қосылған өзен мұздарының кедергісіз өтіп кетуіне ықпал етеді. Сондай-ақ алдағы аптада арықтар мен каналдар, бөгеттер, тасжолдардағы су өткелдерін қар мен мұздан, қоқыстан тазарту жұмыстары басталады.
