Кездесуде саяси диалогті жандандыру, сауда-экономикалық және инвестициялық байланыстарды нығайту, мәдени-гуманитарлық саладағы екіжақты іс-қимылды дамыту перспективалары талқыланды. Әңгімелесу барысында энергетика, көлік, ауыл шаруашылығы, цифрлық технологиялар, инновациялар, білім беру және туризм сияқты салаларда серіктестікті тереңдету мәселелері де айтылды. Осыған орай тараптар шарттық-құқықтық базаны одан әрі жетілдіруге және әртүрлі деңгейдегі сапарлармен алмасу тәжірибесін жалғастыруға өзара дайындығын білдірді.
«Қазақстан Марокконы Таяу Шығыс пен Солтүстік Африка өңірінде маңызды және жақын серіктес ретінде таниды. 30 жылдан аса дипломатиялық қарым-қатынастар барысында біз ортақ құндылықтарға негізделген мазмұнды саяси диалог құра алдық және сындарлы парламентаралық өзара іс-қимылды жолға қойдық», деді Мұрат Нұртілеу.
Өз кезегінде Насер Бурита Қазақстанның Орталық Азия өңіріндегі көшбасшылық рөлін ерекше атап өтіп, өзара іс-қимылды сапалы нығайтуға мүдделі екенін жеткізді. Әрі ол екі елді Солтүстік Африка мен Орталық Азияға қақпа ретінде қарастыратынын айтты.
Былтыр екі ел арасындағы тауар айналымы 70%-ға өсіп, 274 млн долларға жеткен. Осыны ескерген ҚР СІМ басшысы еліміз дайын мұнай-химия және металлургия өнімдерін, азық-түлік тауарларын қоса алғанда, 130 млн доллар сомасына 25 негізгі тауар позициясы бойынша экспортты кеңейтуге ниетін білдірді. Оған қоса М.Нұртілеу Мароккоға Азық-түлік қауіпсіздігі жөніндегі Ислам ұйымының (АҚИҰ) қызметіне қызығушылық танытқаны үшін ризашылығын білдіріп, оның Жарғысын жақын арада ратификациялаудың маңыздылығын тілге тиек етті. Жиын барысында биыл Астанада өтетін АҚИҰ-ның жетінші Бас ассамблеясына қатысуға шақырды.
Сондай-ақ тараптар мамыр айында өтетін Астана халықаралық форумын және биылға жоспарланған Әлемдік және дәстүрлі діндер лидерлерінің 8-съезі төңірегінде әңгіме өрбітті. Талқылауда цифрландыру тақырыбы да назардан тыс қалмады. Қазақстан тарапы цифрлық экономиканы дамытуға бағытталған «Digital Morocco 2030» бағдарламасы шеңберінде Мароккомен ынтымақтастыққа мүдделілігін білдірді және қазақстандық IT-компаниялардың электрондық үкімет, инновациялық IT-шешімдер және киберқауіпсіздік саласындағы қанатқақты жобаларды ұсынуға дайындығы туралы хабардар етті.
Министрлер Марокко жұртшылығының үлкен қызығушылығын тудырған Астана академиялық филармониясы мен Рабаттың бас оркестрі концертінің сәтті өтуіне, мәдени-гуманитарлық байланыстарды нығайтудың маңыздылығына баса мән берді.
Айта кетерлігі, жақын арада екіжақты визасыз режім туралы келісім күшіне енеді. Бұл іскерлік байланыстарды дамыту және азаматтар арасындағы байланыстарды кеңейту үшін жасалған. Ерекшелігі сол, Марокко – осы типтегі байланыс орнатқан Африкадағы алғашқы еліміз. Сондықтан кездесуде тараптар биыл әуе қатынасы туралы келісім бойынша жұмысты аяқтауға және тікелей әуе рейстерін іске қосу мүмкіндігін қарастыруға келісті.
Келіссөздер қорытындысында екі ел саяси, экономикалық және гуманитарлық салалардағы Қазақстан-Марокко қарым-қатынасын одан әрі нығайтуға деген өзара ұмтылысын көрсетті.
Сапар аясында қазақ делегациясы сұлтан мен тұңғыш король V Мұхаммед (1909–1961) кесенесіне барды. Рабаттың орталығында монарх пен оның екі ұлының қабірі бар керемет ғимарат әйгілі Хасан мұнарасының жанында орналасқан. ҚР СІМ басшысы гүл шоқтарын қойып, құрметті қонақтар кітабына жазба қалдырды.
Бұған қоса М.Нұртілеу экономиканың түрлі секторларында жұмыс істейтін жетекші марокколық компаниялар өкілдерімен бірқатар кездесу өткізді. Атап айтсақ, «Zine Capital Invest» холдингінің президенті Нуреддин Зинмен жүздесу барысында ауыл шаруашылығы, азық-түлік өндірісі және логистика саласындағы ынтымақтастық мүмкіндіктері талқыланды. Ал «Alomra Group International» бас директоры Дрисс Беномармен сұхбат қауіпсіздік саласында инновациялық шешімдерді енгізу перспективаларына бағытталды.
«Cadex Group» компаниясының президенті Джавад Юссефимен кездесу барысында тау-кен металлургия кәсіпорындарына техникалық қызмет көрсету саласындағы ынтымақтастық мәселелері қаралды. «Anfa Realities» компаниясының негізін қалаушы Юнес Эссасимен жүздесуде құрылыс саласындағы бірлескен жобалар сөз болды. Талқылаулар барысында Қазақстан Үкіметі Мароккомен экономикалық және инвестициялық байланыстарды нығайтуға ықпал ететін бастамалар мен жобаларды табысты іске асыру үшін жан-жақты қолдау көрсететінін жеткізді.
