Суретті түсірген – Жұмабай МҰСАБЕКОВ
Қаратал топырағына барып «Шакира Нұржұманқызы» десеңіз, жұртшылық «Әлгі трактор жүргізген Шакира ғой» деп, бірден таниды. Бұл мүмкін бүгінде жеңіл автокөлікті тізгіндеп жүрген көпшілік қыз-келіншектерге таңсық болар. Бірақ өткен ғасырдың орта шеніндегі әйел-аналар жастайынан ауыр техникаға отырып, еңбектің нақ үлгісін көрсете білді.
Шакира Нұржұманқызы Қаратал ауданы, Кәлпе ұжымшары, Киров тауарлы сүт бөлімшесінде көпбалалы қарапайым отбасында дүниеге келген. Бір отбасында 10 бала тәрбиеленіп өскен. Әкесі Нұржұман сол ауылдағы сүт фермасында бірнеше жыл мал дәрігері болып қызмет атқарған. Анасы болса сол фермада 40 жылдан астам уақыт бойы сауыншы болып еңбек еткен. Екі еңбек адамының тәрбиесін көрген жанның ер адамға бергісіз қарекетке баруы қайран қалдырады.
«Біздің заманның бет-бейнесі бетімізге түскен әжіммен өлшенсе керек. Әке-шешеміздің етегінде жүріп, тірлікке ерте араластық. Заман қиын, еңбек етсеңіз ғана елден қалмайсыз. Сиыр саудық, жер жырттық, егін ектік, қолымыздан не келеді, бәрін атқардық. Ол уақытта мына жұмыс ұнамайды, мына жұмыс ұнайды деген сөз жоқ. Берілген тапсырманы орындауға міндеттісің. Сөйтіп жүріп жетілдік. Қазір қарап отырсаңыз, бәрі ертегі секілді», дейді кейіпкеріміз.
Бала күнінде сүт фермаға барып аналарымен бірге сиыр сауған. Мектептен тыс уақытында сол әке-шешесі еңбек ететін зауытты жағалаған. Әкелеріне ілесіп, малға жемшөп беріп, көмектесіп те жүрген. Үйдің үлкенінің бірі болғандықтан, өзінен кейінгі бауырларына қамқорлық танытып, қадағалап отырған. Олардың кірін жуып, тамағын істеп, жұмыстан қолы босай бермейтін анасына қолғабыс еткен.
Жазғы демалыс кезінде Кәлпе ұжымшарының егістік алқабына барып, қант қызылшасының арам шөбін шауып, мектепке барар киім-кешегін сатып алған. Бала кезден осындай ауыл шаруаларына ерте араласқанның нәтижесінде Кәлпе орта мектебін бітірісімен, 17 жасында осы кеңшарда сауыншы болып еңбек жолын бастады. Еңбексүйгіштігінің арқасында үш айлық механизаторлық курсты бітіріп алды. Қолына құжатын алған бетте бірден МТЗ-40 тракторына отырып, еңбек жолын механизатор болып жалғастырды.
«Ол кезде кеңшарда төрт қыздан құрылған «Қарлығаш» атты комсомол жастары механизаторлар бригадасы болатын. Мен осы бригадаға бесінші болып қабылдандым. Бригада мүшелері ішінде ауылдағы Құтжан Байгөзова, Бақыт Садазбаева бар еді. Партия қатарына өттім. Кәлпе ұжымшары Киров ауылдық округіне екі мәрте депутат болып сайландым. Ауданда еңбек озаттары қатарына ілініп, аудан, облыс әкімшілігінің бірнеше алғысхаттары, мақтау грамотасы, дипломдарымен марапатталдым. Ерен еңбегіміз жөнінде облыстық, аудандық газеттерде бірнеше мақала жарияланды. Еңбек озаты ретінде облыс, аудан әкімшілігінің алдындағы еңбек озаттары тақтасына суретіміз ілінді», деп еске алады өзі сол бір аяулы сәттерді.
Кәлпе ұжымшарында Айдар тауарлы сүт бөлімшесінде тұратын Асылхан есімді азаматпен отбасын құрып, төрт баланың анасы атанды. Отбасылық өмірімен ғана шектеліп қалмай, ауылдағы түрлі шаруашылық жұмыстарға да белсене араласып тұрды. Көрші ауылда «Жағатал» асыл тұқымды құс фермасы ашылып, еңбек жолын сол өндіріс орнында бригадир болып жалғастыруды жүрегі қалады. Кейін Талдықорған қаласындағы зоотехникалық техникумын бітіріп, сүт фермасында бірнеше жыл техник-осеменатор болып жұмыс істеді.
«Ұяда не көрсең, ұшқанда соны ілерсің» демекші, ұлдарым да біздің жолымызды қуып ауыл шаруашылығында еңбек етіп жатыр. Айдос екі қыз тәрбиелеп отыр, Елдостың үш қызы бар. Келіндерім мәдениет саласында қызмет істейді. Қызым Гүлмира тұрмыста, ұл-қыз өсіріп отырған ана. Облыс орталығындағы №24 мектеп-лицейде ақпараттану пәнінің мұғалімі», дейді Шакира апа.
2000 жылы отбасымен жеке шаруа қожалығын құрған. Бүгінде сол қожалыққа басшылық жасап отыр. Жолдасы Асылхан, ұлдары Айдос пен Елдостың қолдауымен шаруашылықты кеңейтіп жатыр. Кейінгі жылдары қосымша қант қызылшасын өсіруді қолға алған. Жыл сайын 19 гектар суармалы жердің әр гектарынан 70-80 тоннадан тәтті түбір алады.
Жетісу облысы
