Венера – «KEGOC» Орталық жүйеаралық электр торабы филиалына қарасты «Жезқазған» қосалқы стансасының 6-разрядты электрмонтері. Өз ісінің хас шеберіне айналғанша қызығы мен қиындығы қатар жүрген тіршілік тепкішектерін басып өтті. Астанаға таяу Аршалы ауданында көпбалалы отбасында туып-өскен. Мектептен соң медицина саласын таңдаған. Оған аяулы анасы мен туған-туыстары қатты қуанды. Себебі әкесі қырықтан енді аса бергенде көз жұмып, жесір қалған анасы 9 баланы өсіріп, жетілдіріп келе жатыр еді.
Өмірлік жары Ахатпен Қарағанды медицина институтында оқып жүріп танысты. Бірақ отбасылық жағдайға байланысты оқу орнын толық аяқтамай, басқа мамандыққа ауысып кетті. 1997 жылы Жезқазған политехникалық университетін «Экономика және кәсіпорынды басқару» мамандығы бойынша бітірді. Тау-кен инженері, экономист дәрежесін алып шықты. Қызметін энергетика саласына ауыстырғанда білімін толықтыруды ойлады. 2009 жылы Қазақ көлік университетін «Электрмен жабдықтау» мамандығы бойынша тәмамдады.
Венераның бауырлары оның өте қамқор, қайырымды жан екенін айтады. Ал әріптестері кәсібилігі мен талапшылдығы туралы әңгімелейді. Бүгінде отағасы екеуі берекелі отбасының ұйытқысы болып отыр. Ботакөз есімді қызы Астанадағы Қытай компаниясында қызмет істесе, ұлы Асқар «Қазақмыс» корпорациясында еңбек етеді.
«Шуақты көктемнің шырайы – гүл мен әйел ғой. 8 наурыз – әйелдердің халықаралық мерекесінде аяулы анам Рымтай Кенжебекқызын еске аламын. Жап-жас кезінде күйеуі біздің әкеміз Рахымтай Кәрбозұлынан айырылып, 9 баланы жалғыз жүріп жетілдірді. Өмірдің даңғыл жолына салды. Оқытты, тоқытты, жан баласынан кем қылған жоқ. Соның арқасында сүйікті ісімізбен айналысып, ел экономикасына титімдей болса да үлесімізді қосып отырмыз. Барша аруларды айтулы мейраммен құттықтаймын», дейді Венера.
