Сурет: mail.kz
Бұл жобаны іске асыру елдің орталық және батыс өңірлері арасындағы жолды 560 шақырымға қысқартуға мүмкіндік береді. Сонымен қатар осынау ауқымды жоба бүкіл Торғай өңірінің дамуына үлкен серпін сыйлайды. Ол туралы Мемлекет басшысы арнайы тоқталып өтті.
Жол өңірдің ауыл шаруашылығы өндірушілеріне өте тиімді болмақ. Шаруалардың Астана агломерациясы мен елдің батыс облыстарының нарығына қол жеткізуін қамтамасыз етеді. Неліктен бұл жоба еліміз үшін маңызды? Өйткені біз сияқты халық шашырай қоныстанған елдің өңірлер арасындағы байланысын күшейту өте маңызды. Тиімді жол байланысы орнағанда ғана сауда-саттық жақсара түседі, керуен-керуен көш ағылады. Аймақ аралық тауар тасымалы экономикаға қан жүгіртіп, азаматтардың табысы артады. Бұл бер жағы ғана. Үлкен тұрғыдан алғанда халықаралық көлік дәлізіне қарай бет түзейтін маршруттардың аяқ алысы жеңілдеп, шет мемлекеттер үшін біздің транзиттік мүмкіндігіміз арта түседі. Инвестициялық тартымдылығымыз да сөзсіз, молаяды.
Дамыған көлік жүйесі – экономикалық өсімге, макроөңірлерді біртұтас экономикалық жүйеге интеграциялауға, қашықты қысқартуға және бизнестің шығындарын азайтуға, сондай-ақ халықтың өмір сүру сапасын арттыруға қажетті жағдайлар туғызады. Сондықтан елдің аумақтық-кеңістіктік саясатының басымдықтарының бірі өңірлердің көліктік байланысын қамтамасыз ету болып отыр. Орталық өңірді батыс аймақпен байланыстыратын жолды салу Орталық – Батыс дәлізін және елдің бірыңғай көлік қабырғасын қалыптастырудағы маңызды қадам болмақ.
Әрине өңірлер арасындағы дамыған көлік байланысын орнатпай елдің көлік қабырғасын нығайту мүмкін емес. Астана – Арқалық – Торғай – Ырғыз бағыты бойынша Транскаспий халықаралық көлік бағытына шығатын Орталық-Батыс дәлізі Астананы батыс өңірлермен жалғайды. Тиісінше, айтылған бағыттардағы тіршілікті әлденеше есе жандандырады. Бұл өз кезегінде орталық және батыс өңір арасындағы жүк айналымын ұлғайтуға, олардың кооперациясына, автомобиль, теңіз және теміржол көлігі тасымалдарын интеграциялауға жағдай жасайды. Бұдан басқа, отандық өндірушілер үшін елдің теңіз порттары арқылы жаңа өткізу нарықтары қолжетімді болады.
Нұрболат Құрметұлы,
«Экономикалық зерттеулер институты» АҚ Өңірлік зерттеулер және өмір сапасы орталығының
директоры
