Ол Қырғызстанның Бішкек (бұрынғы Фрунзе) қаласында дүниеге келген. Сонда ержетіп, педагогика саласында кеңес одағындағы ең жас ғылым кандидаты атанған. Кейін философия ғылымдарының докторы болды. 80-жылдардың соңында алдымен Қырғызстанда, кейін Қазақстанда кәсіпкерлікпен айналыса бастады.
Еуразиялық өнеркәсіп қауымдастығын (ЕӨҚ) құрушылардың бірі ретінде Қазақстанның металлургия, энергетика мен көлік тасымалы салаларындағы бірқатар ірі өнеркәсіп кәсіпорындарын біріктірді. Бүгінде бұл құрылым Eurasian Resources Group (ERG) аталады. Aлександр Антонович ұзақ жылдар бойы компанияны басқарып, дамытуға сүбелі үлес қосты. 2014–2024 жылдар аралығында ERG Директорлар кеңесінің төрағасы болды.
Осы мерзім ішінде ауқымды жұмыс атқарылып, көптеген инвестициялық жоба жүзеге асырылды. Елдегі бірден-бір жоғары сапалы бастапқы алюминий өндіруші – Қазақстан электролиз зауыты салынды. Ақтөбе ферроқорытпа зауытының №4 балқыту цехы іске қосылды. Соның арқасында кәсіпорын феррохром өндірісіндегі әлемдік көшбасшылар қатарына кірді.
А.Машкевич ұзақ жылдар бойы «Еуразиялық банк» АҚ Директорлары кеңесінің төрағасы да болды. Ол жетекшілік еткен тұста аталған қаржы институты Қазақстанның банк қызметтері саласындағы көшбасшылардың біріне айналды.
А. Машкевич Қазақстан экономикасын, әсіресе тау-кен металлургия секторын дамытуға зор үлес қосты. Ширек ғасырдан астам уақыт бойы Қазақстан Республикасы Президентінің жанындағы Шетелдік инвесторлар кеңесінің мүшесі болды. Кеңестің жалпы отырыстарында елдегі өзекті саяси және экономикалық мәселелерді талқылауға, қабылданған шешімдерді іске асыруға белсене атсалысты. Александр Антонович экономика, өнеркәсіп, ғылым мен мәдениет салаларындағы халықаралық форумдарға ұдайы қатысып жүрді. Өзекжарды пікірлері үнемі қоғамдық резонанс тудырып, ең кірпияз тыңдарманның да көңілінен шығып жататын. Оның өндірісті жаңғырту мен корпоративтік басқаруды жетілдіруге қатысты ұсыныстары ең озық халықаралық тәжірибелер мен технологияларды қолдануға ұмтылатын ERG кәсіпорындарында нақты көрініс тапты.
2000 жылы А. Машкевичтің бастамасымен Қазақстандағы Еврейлер конгресі құрылды. Ол Еуразиялық және Қазақстан еврейлер конгрестеріне жетекшілік етті. Мақсаты – этносаралық және дінаралық диалогті нығай-ту еді.
А.Машкевичтің қамқорлығымен көптеген әлеуметтік және білім беру бастамалары сәтті іске асты. Елдегі тосын апаттар кезінде оның тікелей тапсырмасымен ERG алғашқы болып қаражат бөлгені – Aлександр Антоновичтің жомарттығының айғағы.
Қазақстанның әлеуметтік-экономикалық дамуына елеулі үлес қосқаны үшін «Құрмет» (2001 жыл), «Парасат» (2016), ІІІ дәрежелі «Барыс» (2021) ордендерімен марапатталды. Қазақстан Республикасы Тәуелсіздігінің 30 жылдығы қарсаңында елдің әлеуметтік-экономикалық дамуына сіңірген зор еңбегі үшін І дәрежелі «Барыс» (2021) орденіне ие болды.
Жаны жомарт, жүрегі кең, ұшқыр ойлы азамат ортасына сыйлы еді. ERG кәсіпорындарының жұмыскерлері А. Машкевичті кәсіби біліктілігі мен асыл адамгершілік қасиеттері үшін ерекше қадірлеп, құрметтейтін.
ERG-дің мыңдаған еңбек ұжымы Aлександр Антонович Машкевичтің қазасына байланысты жан жары – Лариса Васильевна мен туған-туыстарына қайғыларына ортақтасып көңіл айтады.
Александр Антонович саналы ғұмырын адамдарға бақыт сыйлау жолына сарп етті. Жарқын бейнесі мен риясыз күлкісі оны білетін адамдардың жадында әрдайым сақталады.
Eurasian Resources Group
