Фото: Жоғарғы Сот
ЖШС 2014 жылдан бері жер телімін иеленіп келген. 2023 жылы ЖШС-ға жер заңнамасының бұзылуын жою туралы ұйғарым шығарылған. Бір жылдан кейін қайталап жүргізілген тексерісте жер телімінің игерілмегені анықталған.
«Бірінші сатыдағы сот Атырау облысының жер ресурстарын басқару жөніндегі департаменттің меншік иесінен мақсаты бойынша пайдаланылмай жатқан жер телімін мәжбүрлеп алып қою туралы талап қоюын қанағаттандырған. Алайда, апелляция ЖШС-ның ұйғарымды орындау (жобалау-құрылыс жұмыстарын жүргізуге шарт жасау және сәулет-жоспарлау тапсырмасын келісу) бойынша шаралар қабылдағанын алға тартып, бұл шешімнің күшін жойған. Бірақ бұл шаралар жер телімін игерудің бастапқы бөлігі болып табылады», делінген хабарламада.
Айта кетейік, жер кодексінің (ЖК) 94-бабында жер учаскесін нысаналы мақсаты бойынша пайдалану шараларын қабылдау үшін бір жыл мерзім көзделгенін ескере отырып, бұл шаралар іс жүзінде ұйғарым шығарылғанға дейін қабылдануы тиіс.
Жоғарғы Соттың азаматтық істер жөніндегі сот алқасы істі қарай отырып, мыналарды көрсетті:
- Егер жобалық-сметалық құжаттамада басқа мерзім көзделмесе және учаске жеке тұрғын үй құрылысына арналмаған болса, жер учаскесін игеру оны бөлу туралы шешім қабылданған күннен бастап 3 жыл ішінде жүзеге асырылуы тиіс;
- Шарт жасасу және құжаттаманы бекіту учаскені әзірленген деп тану үшін жеткілікті негіз бола алмайды;
- Жер учаскесінде іс жүзінде оны игеру үшін қандайда бір құрылыс басталмаған, бұл Жер кодексінің 92-бабының талаптарына қайшы келеді.
Нәтижесінде Жоғарғы Сот мақсаты бойынша пайдаланылмай жатқан жер учаскесін мәжбүрлеп алып қою ісі бойынша бірінші сатыдағы соттың шешімін қалпына келтірді.
