Асқар асуларды бірге бағындырамыз

Светлана ЛЮБИНА, банк қызметкері. Елбасы Нұрсұлтан Назарбаев ұлықтау салтанатында қазақстандықтар алдында көптеген міндеттерді шешу үшін жұдырықтай жұмылу, сыртқы фактордан төнетін сын-қатерлерге қарсы тұра білу қажеттігін алға тартты. Шындығында, келешекті ойлаған елдің басшысы алдағы күндері атқарылатын жұмыстарының жоспарын жасақтайды. Осы орайда Елбасының о бастан келешекті болжай білетін көрегендігіне тәнті болып келемін. Мәселен, 1997 жылы «Қазақстан-2030» Стратегиясын ұсынды. Сол кезде бұған таңдана, тіпті, күмәнмен қарағандар да көп болды. Алайда, бастаған ісін тиянақсыз қалдырмайтын, айтқан уәдесінде тұратын Нұрсұлтан Назарбаев өзі тізгінін ұстаған тәуелсіз ел экономикасын «Қазақстан-2030» Стратегиясында көзделген бағыттармен дамытуға белсене кірісті. Бұл Стратегияда көзделген міндеттер 15 жылда орындалып, табысты жетістіктерге қол жеткіздік. Ал бұдан кейінгі «Қазақстан-2050» Стратегиясында да айқындалған міндеттер мен жоспарлар отандық экономиканы әлемдік бәсекеге қабілетті етуді, сөйтіп, Қазақстанды ең дамыған 30 елдің қатарына кіріктіруді көздеді. Осы Стратегия аясын­да елімізде үдемелі индустриялық-инно­­ва­циялық даму бағдарламасы қолға алынды. Бұл бағдарламаның алғашқы бес­жыл­дығында экономиканың әр саласын қар­қынды дамытуға серпін берген кәсіп­­орын­дар көптеп іске қосылды. Жаңа жұ­мыс орын­­дары ашылды. Бұрын-соңды елімізде шығарылмаған жаңа өнімдер халық­ара­лық талапқа сай шығарыла бастады. Жаһандану үдерісі кең қанат жайған сайын сыртқы фактордан төнуі мүмкін сын-қатерлердің болатындығы және дау­сыз. Елбасы атап өткендей, әлемдегі өзгерістер әр мемлекеттің, соның ішінде, біздің де алдымызға таңдау қояры сөзсіз, яғни қазіргі экономикалық өркендеуді одан әрі жеделдете түсу қажеттігін қойып отыр. Міне, осы себептен, Нұрсұлтан Назарбаевтың бес институттық реформадан құралған Ұлт жоспарын ұсынуының айрықша маңызы бар. Ал оны іске асыру тек Жаңғырту жөніндегі ұлттық комиссия мүшелерінің ғана міндеті деген ұшқары ойдан аулақ болуымыз қажет. Ұлт жоспары – елді өркендетіп, асқар асуларды бағындырудың бас жоспары. Рас, ондағы бес институттық реформаны бір мезетте қатар іске асыру мүмкін емес. Сол себептен, оны кезең-кезеңмен іске асыру ісіне атсалысу қазақ жерін мекен еткен, ауасын жұтып, суын ішкен әр азаматтың төл міндеті болғаны жөн деп ойлаймын. АТЫРАУ.