Ол бала кезінен техникаға құмар болып өсті. 1981 жылы қазіргі Тараз (бұрынғы Жамбыл) қаласындағы №56 кәсіптік-техникалық училищеге оқуға түсті. Сол кезде бар болғаны 14 жаста еді.
«Училищені 1984 жылы кран машинисі мамандығымен бітірдім. Оқу орнынан жолдамамен Тараз қаласындағы силикат зауытына жұмысқа жіберді. Атыраулық Марат деген жігіт сол жылы күзде Тараздағы әскери бөлімге борышын өтеуге шақырылған екен. Құрылыс саласындағы әскери бөлім болғандықтан, солдаттар біздің зауытта жұмыс істеді. Біз сол кезде таныстық», дейді Б.Санқыбаева.
Тараздағы әскери бөлімді 1986 жылғы көктемде Атырауға көшіріпті. Сол кезде Марат қызылордалық бойжеткенге отбасын құруға ұсыныс білдірген. Бірақ өзі әскери борышын өтеп жүргендіктен, болашақ келінін анасы алып кеткен.
«Марат Атырауға әскери бөліммен бірге келді. Үйге асығып тұратын еді. Офицерлер «Үйіңе жиі барасың» деп, оны Ақтөбе облысының Хромтау қаласына ауыстырып жіберді. Содан үйге қараша айында келді. Марат екеуміз 2 ұл, 1 қыз тәрбиелеп өсірдік. Өкінішке қарай, күйеуім өмірден өтіп кетті», дейді ол.
Оған алғашында мұнайлы шаһардағы балшық батпақ пен масаға үйрену оңай болмапты. Сол кезде күйеуінің: «Қиналып жүргеніңді білемін. Сәл шыдасаң, үйреніп кетесің. Балаларымыздың қызығын бірге көреміз», деген сөзі жігер беріпті.
«Қазір күйеуімнің өмірде жоқтығы өзегімді өртейді. Дегенмен ұлдар ержетті, қыз бойжетті. Үлкен ұлым көлік жүргізушісі, қызым локомотив депосында бас есепші болып жұмыс істейді. Кіші ұлым тепловоз машинисінің көмекшісі, жақында білімін жетілдіруге аттанды», дейді Бахытгүл Қуанышбайқызы.
Оның айтуынша, кран машинисі мамандығыммен жұмыс істегеніне 41 жыл болыпты. Бұл – аз уақыт емес. Жұмыс бабына орай бірнеше мекемеге ауысқан. Бірақ мамандығына адалдықтан таймай, өзге кәсіпті таңдамаған. Атырауға келген соң, 1996 жылға дейін «Тастемір» АҚ-да 10 жыл жұмыс істеді. Одан кейінгі төрт жылын Атырау теміржол стансасындағы вагон депосына арнады. 2003–2010 жылдары «Қазкомсервис» ЖШС-да де кран машинисі ретінде жұмысын одан әрі жалғастырды. Кейінгі 15 жылдан бері «Ақжайық-7» ЖШС-да жұмыс істеп келеді.
«Әр мамандықтың өзіндік ерекшелігі бар. Кран машинисіне қырағылық пен дәлдік қажет. Өйткені биікке көтерген жүкті ештеңеге ұрындырмай, көзделген жерге дәл қою керек. Жалпы, тәжірибе жинаған маманға жұмыс істеудің түк қиындығы жоқ. Биыл жұмысшы мамандығына ерекше көңіл бөлініп жатыр. Президенттің қолынан марапат алудың, Ақордаға кірудің әсері бөлек екен. Бұл тосынсый болды. Мемлекеттің қарапайым жұмысшыларға қолдау көрсететінін сезіндім», деді ол.
Атырау облысы
