«Бөрілі байрақ астында
Бөгеліп көрген жан емен.
Бөрідей жортып кеткенде,
Бөлініп қалған жан емен.
Бөрілі найза ұстаса,
Түйремей кеткен жан емен.
Бөрілі байрақ құласа,
Күйремей кеткен жан емен.
Бөрі басы — ұраным,
Бөрілі менің байрағым.
Бөрілі байрақ көтерсе,
Қозып кетер қайдағым», деген екен Алты Алашты аузына қаратқан арқалы шайыр.
Әртүрлі салтанатты жиындарда және халықаралық спорт жарыстарында Мемлекеттік туымыз көтеріліп, Әнұранымыз орындалған сайын кеудемізді мақтаныш пен қуаныш кернейді. Сол қасиетті мемлекеттік рәмізімізді жуырда Атырауда ниқаб киген төрт жас қыз қорлағаны жұртшылықтың ашу-ызасын туғызды. Олар араб тіліндегі сөздер жазылып, астына қылыш қойылған Мемлекеттік Туды ұстап тұрып суретке түскен. Сол сурет әлеуметтік желіде тарап кеткен. Осыған орай қазір жергілікті полиция қылмыстық іс қозғап, сотқа дейінгі тергеу амалдарын жүргізіп жатыр.
«Таралған жазбадағы төрт күдікті де анықталып, полиция бөлімшесіне жеткізілді. Олардың екеуі кәмелетке толмағандықтан, ата-аналарының қатысуымен жауап алынып жатыр», деп мәлімдеді Атырау облысы полиция департаментінің баспасөз қызметі.
Күдіктілердің кінәсі дәлелденсе, олар сот арқылы жазаға тартылуы мүмкін. Қылмыстық кодекстің 372-бабында: «Қазақстан Республикасының мемлекеттік рәміздерін қорлау – үш мың айлық есептiк көрсеткiшке дейінгі мөлшерде айыппұл салуға не сол мөлшерде түзеу жұмыстарына не 900 сағатқа дейінгі мерзімге қоғамдық жұмыстарға тартуға не екі жылға дейiнгi мерзiмге бас бостандығын шектеуге не сол мерзiмге бас бостандығынан айыруға жазаланады», деп көрсетілген. Бұған қоса қорланған Мемлекеттік Ту электронды саудадан алынып тасталды.
Осы келеңсіз оқиғаға байланысты Парламент Мәжілісінің депутаты Айгүл Құспан әлеуметтік желідегі парақшасында: «Желіде араб тіліндегі жазуы бар қазақстандық туды ұстап тұрған төрт жасөспірімнің суреті пайда болғанда менің көзіме жазудың өте сапалы, зауыттық әдіспен басып шығарылғаны түсті. Бірден өрескел арандатушылық туралы ой келді. Сондықтан мен азаматтарымызды даналық танытуға, арандатушылыққа ермеуге, мұндай өнімді сатып алмауға шақырамын. Өйткені алдағы уақытта маркетплейстер шекаралары бұрмаланған Қазақстан картасын немесе осындай арандатушылық сипаттағы өзге де тауарларды ұсынуы ғажап емес. Біздің құқық қорғау органдарымыз мұндай фактілерге жедел ден қойып отыруы қажет. Себебі олардың артында біздің қоғамда тұрақсыздық туындауына мүдделі күштер тұруы ықтимал. Ал өз әріптестерім – парламентшілерге қолданыстағы заңнамаға мемлекетіміздің негізіне нұқсан келтіретін тауарларды сататын маркетплейстерге қарсы санкцияларды көздейтін түзетулер енгізу туралы бірлесіп ойлануды ұсынамын. Сондай-ақ осы нақты жағдайда мемлекеттік рәміздерді қорлауға жол бергені үшін электрондық сауда алаңының өңірлік басшылығын да жауапқа тарту қажет деп санаймын», деп жазды.
Бұл ретте Ұлттық құрылтайдың жақында Бурабайда өткен төртінші отырысында Президент Қасым-Жомарт Тоқаев: «Теріс ағымдарға, қазақтың болмысына жат идеологияларға тосқауыл қою қажет екеніне еш күмән жоқ. Елімізде дін бостандығына кепілдік берілген. Бірақ жүгенсіздікке, тәртіпсіздікке жол беруге болмайды. Діннің аса маңызды миссиясы – ұлтты ұйыстыру. Діни ұйымдардың қызметін реттейтін құжаттар осы талапқа сай болуға тиіс. Бұл мәселені жан-жақты қарау керек. Соның ішінде заңнаманы жаңа жағдайға бейімдеп отыру өте маңызды», деп атап айтқаны ойға оралады. Үкімет пен Парламент Мемлекет басшысының тапсырмасын созбаққа салмай, жеделдете орындап, пәрменді шешімдер қабылдайды деп сенеміз.
