Қимылды ширататын қадам

Нұрлан ТЕМІРБЕКОВ, Д.Серікбаев атындағы ШҚМТУ ректоры, физика-математика ғылымдарының докторы, профессор, ҰҒА корреспондент-мүшесі. Мемлекет басшысын ұлықтау салтанатына қатысқанымда, Нұрсұлтан Әбішұлының қазіргі жаһандық экономикалық һәм саяси дағдарыс алдында тұрған әлемдегі ірі саясаткерлердің ортасынан ойып тұрып орын алатынын, ойы озық саясаткер тұлғаның Тәуелсіз еліміздің маңдайына бітуі тегін емес екенін тағы бір түйсіндім. Елбасы Ата Заңға сәйкес сайлаудан кейінгі барлық шараларды ширақ қимылмен атқаруға кірісіп кетті. Үкімет құрамы қайта жасақталды. Жаңғырту жөніндегі ұлттық комиссия құрылды. Ұлықтау салтанатында Президент елдің алдында көптеген келелі істер тұрғанын жеткізді. Соның бірі – бес институттық реформаны ойдағыдай жүзеге асыру. Бұл жоспарды орындауға ұлықтау салтанатынан кейін-ақ кірісу аталған халықтық реформалар мен оны атқару тетігі саналатын Президент жанындағы комиссияның қандай маңызға ие екенін көрсетіп берді. Әлбетте, бүгінгідей құбылмалы кезеңде біздің ішкі саясатымыз бен экономикамыздың беріктігі, тұрақтылығы ауадай қажет. Өйткені, бұл біздің тәуелсіздік жылдары қол жеткізген ең басты байлығымыз. Мемлекетіміз әлемнің дамыған 30 елінің қатарына ену міндетін алға қойып отыр. Осы орайда, Жаңғырту жөніндегі ұлттық комиссия мемлекеттік органдар, азаматтық қоғам институттары мен кәсіпкерлік саласының өзара қарым-қатынасын үйлестіруге сеп болады деген ойдамын. Комиссия құрамына шетелдік сарапшылардың алынуы сыртқы факторларды да ескеруге көмектеседі. Түптеп келгенде, барлық жоба-жоспарымыз бен іс-қимылымыз, еңбегіміз «Нұрлы Жол» Жаңа Экономикалық Саясатын жемісті жүзеге асыруға қызмет етуі тиіс. ӨСКЕМЕН.