Жамбыл облысының прокуроры Нұрғалым Әбдіровтің төрағалығымен құқық қорғау органдарының, жергілікті атқарушы билік өкілдерінің және қаржы нарығы субъектілерінің қатысуымен интернет-алаяқтықпен күрес жөнінде алқа отырысы өтті. Басқосу барысында алаяқтықпен күрес жұмысын күшейту мәселесі, прокуратураның бастамасымен құрылған «Cyberpol» ведомствоаралық тобының және «CyberShekteuTaraz» телеграмм-боты жұмысының межелі мерзімдегі нәтижелері қаралды.
Облыс прокурорының айтуынша, былтыр бірлесіп қолға алған жұмыс нәтижесінде қылмысты ашу көрсеткіші 33 пайызға артқан. Сондай-ақ Ұлттық банктің «Antifrod-Center» орталығы арқылы 346 күдіктінің банк шоттары бұғатталған. Байланыс операторларымен жасалған меморандум арқылы қашықтан қоңырау шалу мүмкіндігін тудыратын 2 «Sim-box» құралы анықталған.
Облыстық прокуратураның ұйытқы болуымен полиция қызметкерлері «Қазақтелеком» және «Kcell» АҚ-мен бірлесіп жедел-іздестіру жұмысын қолға алған. Нәтижесінде, ақпан айында интернет-алаяқтықпен айналысу үшін «Tele-2» операторының 128 сим-картасы салынған «Sim-box» құралы анықталыпты. Сондай-ақ бұл дерек бойынша Ресей азаматы ұсталған. Бұған қоса «CyberShekteuTaraz» ботының көмегімен 224 күмәнді сілтемелер, жарнама, веб сайттар, телефон нөмірлері бұғатталған.
Жалпы алғанда, интернет-алаяқтықпен күрес жұмысы құзырлы органдар тарапынан ілкі сәтке де тоқтаған емес. Жыл басында облыстық прокуратураның мұрындық болуымен облыстық полиция департаментінің қызметкерлері 150 азаматқа қатысты алаяқтық жасап, 80 млн шамасында шығын келтірген ел азаматын күдікті ретінде құрықтаған. Сонымен қатар облыс прокуроры алаяқтықпен байланысты қылмыстың 76 дерегін теріс бағалап отыр. Полиция қызметкерлеріне қатысты қылмыстық істер де тіркелген.
Жиын барысында интернет алаяқтықтың алдын алу мақсатында компьютерлік технология және криптовалюта саласындағы мамандарды тарту қажеттілігі зерделенді. Нақты дерекке сүйенсек, шоттарды уақтылы бұғаттамай, белгіленген талаптарды бұзып, несие бергені үшін 3 қаржы ұйымының жұмысшыларына қатысты немқұрайдылық дерегі бойынша сотқа дейінге тергеп-тексеру жүргізіліп жатыр екен.
Алқа отырысында алаяқтықпен бірлесіп күресудің маңыздылығы жан-жақты талқыланды. Сондай-ақ интернет-алаяқтықпен күресу шараларын күшейту бойынша нақты нұсқаулар берілді.
Тараз
