* 21 маусым – Медицина қызметкері күні
Денсаулық – адам үшін асыл байлық
ҰЛТ ДЕНСАУЛЫҒЫ – БІЗДІҢ ТАБЫСТЫ БОЛАШАҒЫМЫЗДЫҢ НЕГІЗІ
Денсаулық сақтаудың ұлттық жүйесін ұзақ мерзімді жаңғырту аясында біз елдің барлық аумағында медициналық қызметтер сапасының бірыңғай стандарттарын енгізуге, сондай-ақ, медицина мекемелерінің материалдық-техникалық жабдықталуын бірыңғайландыруға тиіспіз. Негізгі басымдықтар: *Сапалы және қолжетімді медициналық қызметтер көрсетумен қамтамасыз ету. *Аурулар түрінің барынша кең спектрін диагностикалау және емдеумен қамтамасыз ету.Н.НАЗАРБАЕВ
«Қазақстан-2050» Стратегиясынан.
Көп жағдай емделушінің өзіне тікелей байланысты
Бүгінде Жамбыл облысы халқының денсаулығы үшін 42 аурухана, соның ішінде 10 орталық аудандық аурухана және 7 ауылдық аурухана, сондай-ақ, 377 амбулаториялық емхана қызмет көрсетеді. Әрине, денсаулық сақтау саласының негізгі бағыттарының бірі – тұрғындардың орташа өмір сүру жасын ұлғайту екені анық. 2014 жылы тұрғындардың өмір сүру ұзақтығы өсіп, 69,6-ны құрады.
– Сондықтан бүгінгі күні денсаулық сақтау саласындағы ең басымды бағыттардың бірі – ана мен баланың денсаулығын қорғау болып табылады, – дейді Жамбыл облыстық денсаулық сақтау басқармасының басшысы Ерлан Масалимов. – 2015 жылдың 4 айында аналар өлімінің көрсеткіші 47,5 пайызға төмендеді. Қазір облыс халқына медициналық көмекті 2751 дәрігер және 9834 орта буын қызметкерлері көрсетуде. Сондай-ақ, жылдан-жылға жас мамандар саны да өсуде. Өткен жылы облысқа 121 жас маман келсе, оның 73,6 пайызы ауылдық жерлерге жұмысқа орналастырылды.
– Өңірлерде медицина саласының құрылыстары бір сәт те бәсеңсіген емес. Осы бағыттағы жұмыстарды бір нақтылай кетсек.
– 2014 жылы жергілікті бюджеттен құны – 1 301,3 млн. теңгені құрайтын 25 нысанның құрылысы жүргізілді. Оның ішінде 7 дәрігерлік амбулатория, 1 фельдшерлік-акушерлік пункт және 17 медициналық пункт бар. Ал биыл жобадан тыс республикалық бюджет есебінен Тараз қаласындағы 300 төсектік қалалық көпсалалы аурухана, 200 төсектік облыстық перинаталдық орталығы және Талас ауданы Қаратау қаласындағы 250 келушіге арналған аудандық орталық емхана құрылыстары жүргізілуде. Алғашқы екі құрылыс жұмыстары ағымдағы жылдың екінші жартыжылдығында аяқталады. Сондай-ақ, жергілікті бюджеттен 707,3 млн. теңгеге Байзақ ауданындағы 60 төсектік туберкулезге қарсы аурухана құрылысы жүргізілуде. Бұл құрылыс та осы жылдың қазан айына дейін аяқталады деп күтілуде.
Жалпы алғанда, республикалық және жергілікті бюджет есебінен 2010-2014 жылдары аралығында 74 денсаулық сақтау нысанының құрылысы іске асырылды.
– Қазір елімізде «Ұлттық скринингтік бағдарлама» деп аталатын жаңа жүйе жұмыс жасап жатыр. Бір сөзбен айтқанда, скрининг – бұл белгілі бір жастағы дені сау адамдарды профилактикалық медициналық тексерілуден өткізу...
– Иә, ойыңызды түсіндім. Біздің елде тұрғындар тұрғылықты мекенжайлары бойынша өздері тіркелген медициналық ұйымдарда скринингтік тексерілуден тегін өткізіледі. Мәселен, Қазақстанда бүгінде қатерлі ісікпен ауыратын 145 мыңға жуық адам тіркелген және жыл сайын бұл көрсеткіш шамамен 3-4 пайызға өсіп отырғаны жасырын емес. Скринингтік тексерілуден өту арқылы онкосырқаттардың алдын алуға болады. Мамандардың айтуынша, Қазақстанда жыл сайын өкпе рагымен ауыратын 350-ге жуық адамға операция жасалады екен, яғни науқасы бастапқы сатыда анықталған адамдардың 5 пайызына ғана ота жасалған.
Тұрғындардың ел экономикасының өсуімен қатар, денсаулық сақтау жүйесінің нығаюын, ал медициналық қызметтердің мейлінше қолжетімді әрі сапалы болуын қалайтыны анық. Бұл ретте біз де қоғам болып, мемлекет болып осы міндетті шешу бағытында жұмыс істеуге тиіспіз. Өйткені, халықтың денсаулығы – еліміздің басты байлығы. Ал, осы байлықтың жақсаруы, ең алдымен, әр адамның өзіне байланысты. Денсаулық сақтау саласын, дәрігерлердің біліктілігін қанша көтергенімізбен, халық денсаулығының жақсаруы осы нәрсеге кеп тіреледі. Сондықтан кез келген аурудың алдын алу, жүйелі түрде өз денсаулығын тексертіп тұру, саламатты өмір сүру – бүгінгі әрбір азаматтың өмір сүру қалыбына айналуы тиіс.
Әңгімелескен
Оралхан ДӘУІТ,
«Егемен Қазақстан».
Жамбыл облысы.
