ЭКСПО туризмді түрлендіре ала ма?

ЭКСПО-2017 аясында Қазақстандағы туризмді дамыту мүмкіндіктері Орталық коммуникациялар қызметінде  өткен баспасөз мәслихатында талқыланды. Оған «Астана ЭКСПО-2017» ҰК» АҚ кеңесшісі Роза Асанбаева, «Атамекен» Ұлттық кәсіпкерлер палатасы басқарма төрағасының орынбасары Гүлнар Құрбанбаева және Қазақстан Туризм индус­триясы одағының директоры Инна Рей қатысты. Брифинг барысында алдағы ЭКСПО-2017 көрмесі еліміздің туризм саласын дамытуға мол мүм­кіндіктер ашатыны айтылды. Яғни, аталған көрмеге шақыру арқылы шетелдіктерді еліміздің басқа да аймақтарына  тартуға болады. «Ұлттық компания қол­да­ныстағы туризм жолбағдарына кешенді талдау жүргізді. Оның негізінде жалпы бағыттар тізі­лімі әзірлену үстінде, онда ЭКСПО-2017 көрмесін көру секілді мүм­кіндіктер қамтылған. Бұл жолбағдарларға «Recommendedby EXPO» белгісі қойылатын болады және олар туралы ақпарат компания сайтында жарияланады. Сондай-ақ, «Recommendedby EXPO» тізіліміне енгізілген тур­пакеттерді ілгерілету және сату жөнінде tripadvisor және  booking.com секілді ірі туристік порталдармен келіссөздер белсенді жүргізілуде», деді Роза Асанбаева. Бұл белсенді жұмыс таяуда әкімдік жанынан құрылған «Астана Конвеншн Бюро» дирекциясымен бірлесе жүргізілетін болады. Инвестициялар және даму министрлігінің зерттеулері бойынша, көрмеге келеді деп күтіліп отырған қонақтардың саны 2,1 млн. адамды құрамақ. Ұлттық компания қызмет көрсетіп жатқан қонақүйлердің жалпы бөлмелер қоры 6,3 мыңға тең келетінін анық­таған. 2017 жылға қарай қосымша тағы 73 қонақ үй салынады. Көрме қонақтары  Астана­ны ғана емес, сонымен бірге, Қа­зақ­станның басқа да аймақтарына барады деп жоспарланып отыр. Туристердің негізгі ағыны Бурабай шипажайының үлесіне келеді деп күтілуде. Шипажайға баруды қолжетімді ету мақсатында Астана-Бурабай автобаны қызмет етуде және Көкшетау қаласының әуежайы қайта жаңғыртылған. Қазіргі таңда Қазақстанның басқа аймақтарында жаңа турлар дайындалып, қолданыстағы турлар жақсартылуда. ЭКСПО брендінің қолдау көрсетуімен Жібек жолының қазақстандық бө­лігі бойында «OrientExpress» са­натына жататын пойызды іске қосу мәселесі қаралуда. Астанаға дей­ін­гі ұшақ билеттерінің ішіне ЭКСПО-2017 көрмесіне бару­дың құ­нын кіргізу туралы «Эйр Ас­­та­на­мен» және шетелдік әуе ­ком­па­ния­­ларымен келіссөздер жүр­гізі­луде. Роза Асанбаева өз сөзінде жер­гілікті туристік компаниялар және де шетелдік компаниялар тарапынан бұл жұмыстарға белсенділік таны­туға тұрақты қызығушылық бай­қалып отырғанын атап өтті. Мәсе­лен, бірнеше қазақстандық тур­операторлар қазірдің өзінде турис­тік пакеттерге ЭКСПО-2017 көр­ме­сінің билетін қосу мүмкін­ді­гін қолға алып жатқанын атап өтті. «Астана ЭКСПО-2017» ұлттық компаниясымен ынтымақтасуға әлемдегі ең ірі туроператор Tou­risticUnionInternational (TUI) да қызығушылық танытуда. Қазіргі таңда ұлттық компания TUI  тур­операторымен серіктестік туралы келіссөздер жүргізуде, бұл Еу­ро­паның нарықтарында ЭКСПО-2017 көрмесіне бару мүмкін­д­ігін ұсынатын Қазақстанға бағыт­талған туристік пакеттерді сатуға мүмкіндік бермек. Неміс опера­торы әлемнің 180 елінен жылы­на 30 миллионнан аса тұтыну­шыға қызмет көрсетеді. Еуропа­ның бір өзінде TUI компания­сына 1800-ден аса туристік агенттік тиесілі. Халықаралық тәжірибе бойынша ЭКСПО көрмесі секілді ау­қымды іс-шараларды өткізу туризм саласын ғана емес, сонымен бірге, экономиканың басқа да са­лаларын дамытуға қозғау салады. Статистикаға сүйенсек, 1 ту­рист өзі келген ел аумағында 1,5 мың долларға жуық қаржыны жұм­сап, шамамен 6-12 адамды жұ­мыс­пен қамтамасыз етеді. Осы­лай­ша көрмені өткізуден алынатын нәтиже орасан зор. Яғни, эконо­ми­ка­ның түрлі салалары мен еліміз­дің азаматтары ЭКСПО-2017 көрмесін өткізу кезінде қосымша табыс таппақ. Динара БІТІКОВА, «Егемен Қазақстан».