Бельгияда соңғы аптада аптап ыстықтан 410 адам қайтыс болды

АСТАНА. 2 тамыз. Бүгінде Еуропаның көптеген елдері аптап ыстықтан зардап шегіп отыр. Әсіресе, Бельгия халқы үшін табиғаттың бұл құбылысы айтарлықтай әсер етуде. Соңғы аптада осы елде ыстық салдарынан 410 адам қайтыс болды. Бұл туралы comandir.com хабарлады. Бельгияның Денсаулық сақтау жөніндегі ғылыми институтының ғалымдары ауа температурасының күрт артуы мен ондағы озон мөлшерінің шамадан тыс көп болуы осындай қайғылы жағдайға әкелгенін айтуда. Еуропада кенеттен басталған дәл мұндай аптап ыстық соңғы рет 2006 жылы тіркелген. Ол кезде ыстық ауа температурасы үш апта бойы сақталған. Зерттеу орталығының мамандары хабарлағандай, қазіргі таңда Бельгиядан бөлек, Франция мен Нидерландыда да ыстық ауа райы сақталуда. Ғалымдардың айтуынша, аптап ыстық барлық жастағы адамдарға бірдей кері әсер етуде. Дегенмен, 85 жастан асқан қариялардың көп зардап шеккендері байқалады. Себебі, қаза тапқандардың 33 пайызы осы буынның өкілдері. Еламан Қоңыр. Дерек, сурет: comandir.com.