Қостанай қаласы әкімінің орынбасары парамен ұсталды

ҚОСТАНАЙ. 3 тамыз. Қостанай қаласы әкімінің орынбасары Мақсұт Қалиев пара алып жатқан жерінен ұсталды. Бұл туралы egemen.kz тілшісі хабарлады. Мемлекеттік қызмет және сыбайлас жемқорлыққа қарсы іс-қимыл агенттігі облыстық департаментінің қызметкерлері Қостанай қаласы әкімінің орынбасары Мақсұт Қалиевті «Сыл» жауапкершілігі шектеулі серіктестігінің директоры Овнанян Гагикадан 13 миллион теңге пара алып жатқан сәтінде ұстады. Алдын ала белгілі болған мәліметтер бойынша, Мақсұт Қалиев қаланың сыртында аэропорт жағында автокөліктерге арналған халыққа қызмет көрсету орталығын салып жатқан «Сыл» серіктестігінің мүддесін көздеген. Овганяннан алған пара құрылыстан «жымқырылған» қаржының бір бөлігі. Мамандар егер бұл әрекеттің жолы кесілмегенде құрылыс үшін бюджеттен бөлінген бір миллиард теңгеден аса қаржының жартысына жуығы жымқырылуы мүмкін екенін айтуда. Нәзира Жәрімбетова. Дерек: egemen.kz. Сурет: tobolinfo.kz.