Батыс Қазақстанда жедел жәрдем жұмысы қарқынды дамуда

ОРАЛ. 6 мамыр. Орал қаласындағы «Жедел медициналық жәрдем» стансасында АДИС бағдарламасы бойынша жасалған автоматтандарылған басқару жүйесінің тұсаукесер рәсімі өтті. Бұл туралы egemen.kz тілшісі хабарлады. Станса директоры Сергей Бекежановтың айтуынша, облыстағы барлық жедел жәрдем жүйесі түгелдей дерлік автоматтандырылған. Бұл өміршең жоба, әсіресе, жеделдік, статистикалық және әкімшілік тұрғысынан үлкен жеңілдіктер әкеліп отыр. Осы тәртіппен АДИС бағдарламасы тек облыс орталығында ғана емес, сонымен бірге, аудандар мен ауылдарда да тиісті бақылау жүйесі мен шұғыл медициналық көмекті іске асыра алады. Сәл шегініс жасар болсақ, мұндай автоматтандырылған жүйе тұңғыш рет 2010 жылы Орал қаласында енгізілген. Одан кейінгі кезде бұл жаңашылдық облыс аудандарына да орныға бастады. Мұның өзі жоғарыда айтылғандай жедел жәрдем қызметінің тиімділігі мен жеделдігін көтерді. Оның шақырылған жерге келу уақытын отыз пайызға тездетті. Сонымен қатар, автоматтандыру есебінен тұрғындарға медициналық қызмет көрсету сапасы жақсарды. «Ақмола связ инвест» ЖШС компаниясы өкілі Марат Айгелевтің айтуынша, аталған қондырғылар Ресейде жасалған. Оның әлемдік бәсекеге төтеп беру қабілеті жоғары. Батыс Қазақстан облысы автоматтандырылған жүйені енгізу мен орнату үшін 48 миллион теңге жұмсады. Орал өңірі әзірге АДИС бағдарламасы облыс орталығына ғана емес, сонымен бірге, аудандарға да енгізілген республикадағы бірінші облыс болып отыр. Темір Құсайын. Дерек, сурет: egemen.kz.