ТАЛДЫҚОРҒАН. 6 мамыр. Алматы облысы Қапшағай қаласындағы Даңқ Мемориалы жанында Ұлы Отан соғысы құрбандарын еске алуға арналған митинг болды. Бұл туралы egemen.kz тілшісі хабарлады.
Еске алу шарасына соғыс ардагерлері, әскери қызметкерлер мен интернационалист жауынгерлер, Қазақстандағы Ресей консулдығының өкілдері және жетісулықтар қатысты. Салтанатты жиында белгіленген тәртіпке орай еліміздің көк байрағы желбіреп, әнұраны шырқалған соң, мәңгілік алау тұтатылды. Волоколамск қаласынан арнайы әкелінген жер капсуласы орнатылып, гүл шоқтары қойылды. «Жеңіс күні – бәріміз үшін айрықша қымбат, қасиетті мереке. Бұл сол Жеңісті жақындату үшін жан аямай шайқасып, қан майданнан оралмаған арыстарымызды еске алатын күн», – деді Алматы облысы әкімінің орынбасары Бақтияр Өнербаев.
Нұрбол Әлдібаев
Дерек, сурет: egemen.kz.
