ҚЫЗЫЛОРДА. 6 мамыр. Қызылордада ішкі істер органдарында абыройлы қызмет еткен ардагерлерге, оның ішінде соғыс ардагерлеріне арналған мәрмәр тақтаның салтанатты түрде ашылу рәсімі өтті. Бұл туралы облыстық ішкі істер департаментінің баспасөз қызметіне сілтеме жасаған egemen.kz тілшісі хабарлайды.
Салтанатты рәсімге ішкі істер органдарының Ұлы Отан соғысы ардагерлері, соғыс ардагерлерінің туыстары, Қызылорда облыстық ардагерлер кеңесінің төрағасы, департамент басшылығы және жеке құрам қатысты.
Шара барысында Ішкі істер министрі, полиция генерал-полковнигі Қалмұханбет Қасымовтың марапаттау жайлы бұйрығы ресми түрде оқылып, министр бұйрығымен Ұлы Отан соғысы ардагері Ислам Әбішбеков Құрмет грамотасына ие болды. Қызылорда облыстық ІІД бастығы, полиция полковнигі Ж.Сүлейменовтің бұйрығымен департаменттің 15 ардагері, сондай-ақ өз қызметтік міндеттеріне адалдықпен қарап, құқықтық тәртіп пен қауіпсіздікті қамтамасыз етуде ерекше көзге түскен департаменттің бірнеше қызметкері марапатталды.
Сонан соң ішкі істер органдарында абыройлы қызмет атқарған Ұлы Отан соғысының 102 ардагерінің аты жазылған мәрмәр тақтаның ашылу рәсімі өтті. Ескерткішті Ұлы Отан соғысының ардагері Махамбет Бержанов пен тыл еңбеккері Пірімбет Байтоқаев ашты. Бұдан кейін жиналғандар 1 минут үнсіздік жариялап, соғыста қаза болғандарды еске алып, рухтарына тағзым етті.
Іс-шара ескерткішке гүл шоқтарын қоюмен қорытындыланып, шара соңында келген қонақтар естелік суретке түсті. Сонымен қатар, ардагерлердің құрметіне мерекелік дастарқан жайылып, концерттік бағдарлама қойылды.
Ержан Байтілес.
Дерек, сурет: egemen.kz.
