Атыраудың екі тұрғыны Волгоградта қайтыс болды

АТЫРАУ. 14 ақпан. Атырау облысының екі тұрғыны Ресейдің Волгоград қаласында көлік ішінде қайтыс болды. Бұл туралы egemen.kz тілшісі хабарлады. Алдымен бұл ақпаратты ресейлік баспасөз құралдары таратқан еді. «Комсомольская парвда в Волгограде» газетінің хабарлауынша, оқыс оқиға 6 ақпан күні болған. Сол күні қорапты «Газель» көлігінің салонынан 27 жастағы жүргізуші жігіт пен 20 жасар жолаушы қыздың денелері табылған. Екеуінің де Атырау қаласының тұрғыны екені анықталған. Атыраулық тұрғындар Волгоградқа «Ямаха» мотоциклін сатып алуға барғанға ұқсайды. Өйткені, көліктің қорабына аталған маркілі мотоциклі тиеліпті. Атырау тұрғындары іздеген заты табылғаннан кейін Атырауға қарай жолға шықпас бұрын ұйықтап алуды көздеген болуы мүмкін. Сол кезде көліктің техникалық ақаулығынан газға улануы жөніндегі болжам теріске шығарылмай отыр. «Бұл оқыс оқиға ретінде тіркелді. Марқұмдардың туыстары Атырау қалалық ішкі істер басқармасына Волгоградтағы сот-медицина сарапшылары шығарған қорытындыны ұсынып, қайтыс болғаны жөнінде анықтама сұрады. Қорытынды марқұмдар денелерінде күштеу, зорлықпен өлтіру іздері анықталмағаны айтылмаған», деп хабарлады Атырау облыстық ішкі істер департаментінің баспасөз хатшысы Гүлназира Мұхтарова. Жолдасбек Шөпеғұл. Дерек: egemen.kz. Сурет: favorit-service.ru.