Астанада Елбасының қатысуымен әскери парад өтуде

АСТАНА. 7 мамыр. Астанада «Қазақ Елі» монументі алаңында Президент – Жоғарғы Бас қолбасшы Нұрсұлтан Назарбаевтың қатысуымен Отан қорғаушылар күніне және Ұлы Жеңістің 70 жылдығына арналған әскери шеру өтуде. Бұл туралы «ҚазАқпарат» хабарлады. Орасан зор әскери парадтың көрсетілімін қазақстандықтар республикалық телеарналардың тікелей эфирінен, сондай-ақ, барлық облыстардағы орталық алаңдарда орнатылған LED-экрандар арқылы көруге мүмкіндік алды. Шеруге 4 747 адам, 227 әскери техника, 70 әскери әуе техникасы және 24 шеру тобы қатысуда. Әскери шеру 3 бөлімнен тұрды: жаяу шеру топтарының өтуі, механикаландырылған колоннаның өтуі және әуе шеруі. 24 шеру тобының 19-ы – Қазақстан Республикаксы Қарулы Күштерінен, оның ішінде соғыс уақытының әскери формасын киген және қаруын асынған (ППШ автоматтары, Мосин винтовкалары, РПД және «Максим» пулеметтері) 3 жаяу шеру тобы болды. Сондай-ақ, Ұлттық гвардиядан – 2, Төтенше жағдайлар комитетінен – 1, Ұлттық қауіпсіздік комитеті Шекара қызметінен – 1, Мемлекеттік күзет қызметінен – 1 топ қатысты. Жеке құрамдағы 4 747 адамның 3 684-і – Қазақстан Республикасы Қарулы күштерінен, 455-і – Ұлттық гвардиядан, 173-і – Төтенше жағдайлар комитетінен, 231-і – Ұлттық қауіпсіздік комитеті Шекара қызметінен, 204-і – Мемлекеттік күзет қызметінен. Шараға қатысып жатқан жалпы әскери техника саны – 227 бірлік. Қазақстан Республикасы Қарулы күштерінен – 188 бірлік техника шығады. Оның ішінде Т-34 танктері, ЗИЛ-157 автокөліктері, ЗИС-2, М-30, РС30 «Катюша» қарулары бар. Сондай-ақ, Ұлттық гвардиядан – 19, Ұлттық қауіпсіздік комитеті Шекара қызметінен – 13, Мемлекеттік күзет қызметінен – 7 бірлік техника қатысады. ҚР Қарулы күштерінен – 59 бірлік, Ұлттық қауіпсіздік комитеті Шекара қызметінен – 6 бірлік, Төтенше жағдайлар комитетінен – 5 бірлік, жалпы саны 70 әуе техникасы қатысуда. Еламан Қоңыр. Дерек: «ҚазАқпарат». Сурет: vlast.kz.