Күн тәртібі қаралды

Қасым-Жомарт Тоқаевтың төрағалық етуімен болған Парламент Сенаты бюросының отырысында палатаның 25 маусымда болатын кезекті жалпы отырысының күн тәртібі қаралды, деп хабарлады Сенаттың баспасөз қызметі. Сенаторлар бірқатар халық­ара­лық құжаттарды ратификация­лауды жоспарлады. Атап айтқанда, олар Каспий теңізінің түбін Қазақ­стан мен Түрікменстан арасында бөлу туралы келісімді, Қазақстан мен Түрікменстан арасындағы Шекара өкілдерінің (шекара комиссарларының) қызметі туралы үкіметаралық келісімді, Қазақстан мен АҚШ арасындағы қылмыстық істер бойынша өзара құқықтық көмек туралы шартты, ТМД-ға қатысушы мемлекеттердің қарулы күштері инженерлік әскерлерінің гуманитарлық минасыздандыру саласындағы ынтымақтастығы туралы келісімді, Каспий теңізінің су биологиялық ресурстарын сақтау және ұтымды пайдалану туралы келісімді ратификациялау туралы құжаттар болатын. Депутаттар отырыста Аза­мат­тық процестік кодексінің жобасын және заңнамаға азаматтық процестік заңнаманы жетілдіру мәселелері бойынша түзетулер енгізу туралы ілеспе заң жобасын бірінші оқылымда қарайды. Сондай-ақ, бірқатар заңнамалық акті­лерге меншік құқығын қорғау­ды күшейту, шарттық міндет­те­ме­лерді қорғауды кепілдендіру және оларды бұзғаны үшін жауап­кершілікті қатаңдату мәселелері бойынша түзетулер енгізу туралы заң жобасын бірінші оқылымда қарауды жоспарлады. Одан басқа, заңнамаға мақта саласын дамыту мәселелері бойынша өзгерістер мен толықтырулар енгізу туралы (бірінші оқылым) және «Өсімдіктер карантині тура­лы» заңға өзгерістер мен толық­ты­рулар енгізу туралы заң жобалары сенаторлардың қарауына ұсынылады. Бас комитеттердің төрағалары заң жобаларының Сенат отырысына дайындығы туралы баяндады. Бюро мүшелері Сенаттың 2015 жылға арналған Негізгі іс-ша­ра­ларының жоспарына өзгерістерді де бекітті. Атап айтқанда, палата Қазақстан Республикасының Мем­лекеттік шекарасындағы «Қорғас» автомобиль өткізу бекетінде вете­ринарлық-санитарлық бақылау және Қорғас өзеніндегі «Достық» су жүйесін бірлесе пайдалану жө­ніндегі мәселелерді талқылау үшін Аграрлық мәселелер, табиғатты пайдалану және ауылдық ау­мақ­тарды дамыту комитетінің биылғы IV тоқсанда Алматы облысына көш­пелі отырысын өткізуді жос­парлап отыр. Бюро отырысында Сенат Төр­а­ғасы Қ.Тоқаев ТМД Парла­мент­аралық Ассамблеясы кеңесінің атынан депутат Елеусін Сағындықовқа «Парламенттік ынтымақтастықты нығайтқаны үшін» медалін табыс етті.