Қарағанды облысында полицейді өлтірген күдікті ұсталды

ҚАРАҒАНДЫ. 23 маусым. Осы айдың басында Қарағанды облысындағы Сәтбаев қаласында белгісіз біреу полиция қызметкерін пышақтап өлтірген болатын. Жақында жедел іздестіру шараларының арқасында күдікті қолға түсті. Бұл туралы облыстық ішкі істер департаментінің баспасөз қызметі хабарлады. Сәтбаев қаласының полиция қызметкерлері үшін әріптестерін өлтірген қылмыскерді іздеп табу намыстың шаруасы еді. Екі апта бойы төңіректі түгел сүзген іздеу шарасы сәтті аяқталып, күдікті қолға түсті. Қазіргі уақытта уақытша ұстау изоляторында қамауда отырған ол Сәтбаев қаласының 30 жастағы тұрғыны болып шықты. Тергеу барысында ұсталған азамат полиция қызметкерін екеуінің арасында орын алған кикілжің үшін өлтіргенін мойындады. Күдікті 46 жастағы жол-патруль полициясы қызметкерінің үйіне терезе арқылы түсіп, бірнеше жерінен пышақ салған. Елді елең еткізген осы оқиғаға қатысты тергеу амалдары жүргізіліп жатыр. Қайрат Әбілдинов. Дерек: Қарағанды облыстық ішкі істер департаментінің баспасөз қызметі. Сурет: diapazon.kz.