«Ақылдастар» ұстанымы айқын

Өткенді танымай, болашаққа жол бастау мүмкін емес. Ел ертеңі үшін ерінбей еңбек еткен кешегі ерлердің, бүгінгі дана қарттарымыздың есімін  жас ұрпақ еш ұмытпауға тиіс. Осыдан біраз жыл бұрын құрылған «Ақылдастар» деп аталатын Семейдегі ардагер-ақсақалдардың қоғамдық ұйымы бүгінде өздерінің атқарған жұмыстарымен қалың көпшілікке, әсіресе, жас­тар қауымына үлгі болып келеді. Шынын айту керек, Кеңес Одағы ыдырап, еліміз тәуелсіздік алған жылдары, әсіресе қалаға үдере көшкен ауыл тұрғындарының арасында Ұлы Отан соғысының ардагерлері көп болды. Сол шақта қалаға келген ардагерлер қауымының не істейміз, әлеуметтік жағдайымызды қалай шешеміз деп біраз қиналып қалғаны да жасырын емес. – Осыдан кейін қоғамнан тысқары қалғанды жөн көрмей, «Ақылдастар» деп аталатын ауыл ардагерлерінің бірлестігін құрдық, – дейді бірлестік төрағасы, ардагер ақсақал Сағындық Бейсенбаев. – Бүгінде заңды түрде тіркелген қоғамдық бірлестігіміздің 120-дан астам тұрақты мүшесі бар. «Ақылдастардың» бір мүшесі Жарма ауданының тумасы, ардагер-журналист Мәуітқазы Зүкеновті қоғамға көп еңбек сіңіргені үшін  арнайы мақтау қағазбен марапаттадық. Бір сөзбен айтқанда, «Ақылдастарда» қаламызға облысымыздың барлық жерінен келген ардагерлер қамтылған. Қала, ел өміріндегі оқиғалардан сырт қалып отырған жоқпыз. Жас ұрпақты отансүйгіштік сезімге баулу, ұлттар арасында достық пен бірлікке дәнекер болу, халқымыздың салт-дәстүрін насихаттау, мемлекеттік тілді дамытуға қолымыздан келгенше жәрдемдесу және тағы басқа мәселелер басты назарымызда. Соны ескерген болар, қалалық әкімдік бірлестікті қызмет кабинетімен қамтамасыз етті. Оның сыртында бірлестіктің 12 белсенді мүшесін Тәуелсіздік мерекесіне орай облыс әкімі мерекелік медальмен марапаттады. Соның бәрі қосыла келгенде көңілімізді көтеріп, өмірге құш-тарлығымызды арттыра түсуде. «Ақылдастар» мүшелері еліміздің қоғамдық өмірінен де сырт қалып көрген емес. Енді, міне, оның мүшелері 26 сәуірде өтетін президенттік сайлауға бір кісідей қатысатындықтарын айтып отыр және барша қазақстандықтарды ел өмірі үшін маңызды осы саяси үдеріске жұмыла қатысуға шақырады. Раушан НҰҒМАНБЕКОВА, журналист. СЕМЕЙ. Суретте: С.Бейсенбаев.