Сайлауды қолдауға арналған форум

Ақтөбе қаласындағы «Қазақстан халқы Ассамблеясы» ғимаратында Қазақстан халқы Ассамблеясының «Біз – Қазақстан халқымыз»  атты республикалық акциясы аясында форум өткізілді. Ақтөбе облысы Қазақстан халқы Ассамблеясы атқарушы хатшы­лығы­ның мұрындық болуымен, «Қоғамдық келісім» коммуналдық мемле­кеттік мекемесі және этномәдени бірлестіктермен бірлесе отырып ұйымдастырған бұл шараға  Ақтөбе облысы  Қазақстан халқы Ассамблеясы жанындағы  аналар кеңесінің, «Бірлік» ақсақалдар кеңесінің, «Ару ана» көп балалы аналар қоғамдық бірлестігінің, жас­тар қанатының мүшелері қатысты. Қоғамдық өмірге белсене араласып жүрген әйелдердің алқалы жиынын Ақтөбе облысы Қазақстан халқы Асссамблеясы  хатшылығының меңгерушісі Жолдас Нұршин қысқаша сөз сөйлеп ашып, алда болатын кезектен тыс президенттік сайлаудың маңызына тоқталды.  Ол жиналғандарға 26 сәуірге тағайындалған сайлау туралы жан-жақты әңгімелеп, сайлау үдерісінің бүгінгі барысынан хабардар етті. Ол өз сөзінде ананың жүрегі әрқашанда өз елінің табысы мен қиыншылығын елден ерекше сезетінін айта келіп, барлық өңірлерде Қазақстан халқы Ассамблеясы жанынан аналар кеңестері құрылғанын атап өтті. Әйелдердің отбасының ажары ғана емес, қоғамдық өмірдің де қуатты күші екенін еске салды. Аналардың рухани және тәрбиелік рөлі,  отбасылық құндылықтарды сақтау және дамыту арқылы  қоғамдық келісімді нығайтуға баға жеткісіз үлес қосып отырғанына тоқталды. Елімізде өткелі жатқан кезектен тыс президенттік сайлауда да ақ жаулықты аналарымыз бен көрікті қыз-келіншектеріміздің ұйымшылдық пен бірліктің ұйытқысы болатынына сенім артты. Одан кейін сөз алған облыс­тық Қазақстан халқы Ассам­блеясы жанындағы «Бірлік» ақсақалдар кеңесінің төраға­сы Еркін Құрманбеков,  украин­дар­дың жексенбілік мектебінің оқытушысы Сталина Балюра, «Шат­лық» татар-башқұрт этномә­дени бірлестігінің басқарма мүшесі Рам­зия Есембаева және басқалары еліміздегі ұлтаралық татулық пен достықтың тұғыры беріктігін тілге тиек етті, алда болатын  сай­лаудың ұйымшылдықпен өтуіне атсалысатындықтарын жеткізді. Форумға қатысушылар  өңір әйелдеріне арнап үндеу қабылдады. Онда елімізде, отбасындағы тұрақтылық пен табыстың, балалар  мен  Қазақстан халқының жарқын болашағы аналарға аса қымбат екені атап көрсетіліп, алда болатын Қазақстан Республикасының кезектен тыс Президент сайлауына барша қазақстандықтарды бір кісідей ұйымшылдықпен қатысуға шақырды. Сатыбалды СӘУІРБАЙ, «Егемен Қазақстан». Ақтөбе облысы.