Фото: instagram.com/athletex_kz
Оқиға туралы ақпаратты жарыс ұйымдастырушылары өздерінің Instagram парақшасында жариялады.
«Бүгінгі жүгіру кезінде қайғылы жағдай орын алды. Біздің қатысушымыз — 70 жастағы Владимир Кривенцов қайтыс болды», делінген хабарламада.
Хабарламада айтылғандай, қайғылы оқиға старттан кейін көп ұзамай болған. Оқиға орнына бірнеше минут ішінде жеткен ТЖД қызметкерлері алғашқы медициналық көмек көрсетіп, зардап шеккен адамды «Медеу» кешенінің құтқару бөлімшесіне жеткізген. Алайда барлық шараларға қарамастан, оны аман алып қалу мүмкін болмады.
Ұйымдастырушылардың айтуынша, Владимир тәжірибелі спортшы болған, түрлі жарыстардың тұрақты қатысушысы еді. Жарысқа дейін медициналық тексеруден өтіп, спортпен айналысуға ешқандай қарсы көрсетілім болмаған.
«Ол әрдайым стартқа жүзінде күлкімен шығатын, белсенді өмір салтының үлгісі еді. Көпшілігіміз үшін ол рухтың күші мен шабыттың символы — спорттың жасқа қарамайтынын дәлелдеген жан болатын», деп жазды ұйымдастырушылар.
Алматылықтар да пікірлерінде Владимир Кривенцовты мейірімді, жанашыр адам әрі жастарға да, спорт ардагерлеріне де үлгі боларлық тұлға ретінде еске алды.
Еске сала кетейік, жарыс Заилий Алатауында өтті. Қатысушыларға бес түрлі қашықтық ұсынылған: T1, Mynzhylky, Alplager, Gorelnik және Canicross (итпен жүгіру). Salomon Trail 2025 — «Қазақстанның Скайраннері» атағы мен белгісін алу үшін өтетін серияның алғашқы кезеңі болды.
