Абырой биігінен түспейміз

Мемлекет басшысы Н.Ә.На­зарбаевтың Дүниежүзілік сау­да ұйымына кіру жөніндегі келіссөздердің аяқталуына байланысты Қазақстан халқына арнаған Үндеуін көлік жүргізіп келе жатқанда тыңдадым. Кешкі сауынға дайындалып жат­қан ­тауарлы-сүт фермасына аяқ тіре­сімен шұғыл жиналыс ашып, ел мерейін өсірген хабар­ды жеткіздім. Осы жолы әріптес­­­терімнің жүзі­нен қуа­ныш пен толқыныс лебін сезіндім. Риза болдым. Өйт­кені, бү­гінгідей алма­ғайып заман­ның­ ойлантарлық тұстары да баршылық. Ауылдастарымның ортасында тұрып мынадай сөздерді айттым: Елбасы бұл қадамды тарихи оқиға деп бағалады. Экономикамызды жаңа көкжиектерге бастайтын ұйымға еліміз 19 жылдық дайын­дықпен, оң мен солын барынша салмақтаған қалпымен келіп отыр. Тиісті тәжірибе жинақ­талды. Оның үстіне, республика сауда-саттығының 90 пайызы Дүниежүзілік сауда ұйымына мүше елдерге тиесілі. Енді біз озық мемлекеттер мүддесіндегі ұйымға жанама қатысушы емес, өзінің ықпалды дауысы бар ел ретінде үлес қосатын боламыз. Әрине, әлемдік сауда ұйымы­ның өзіндік ерекшеліктері мен алға тартар сындары баршылық. Бәсеке еселене түседі. Себебі, Елбасы Үндеуінде айтылғанындай, шетелдерден келетін тауарларға біз шекарамызды ашамыз, та­уар Қазақстанға көптеп келетін болады. Сапа шешуші тұтқа болмақ. Бұл орайда, ДСҰ беретін артықшылықтарды пайдалана білетінімізді дәлелдеу қажет болады. Бұл Қазақстанның қолынан келеді және біз әлемнің озық елдері қатарынан лайықты орын аламыз деп кәміл сенемін. Өйткені, «Алтын сапа» белгісін екі рет жеңіп алған «Родина» агрофирмасы бұл бағыттағы жұмысты жетілдіре түседі. Заманалық жабдықтар орна­тылған цехта сүт өнімдерінің отыз түрі шығарылады. Бұлардың барлығы СТ РК ИСО 9001-2009 сапа менеджменті жүйесімен сер­ти­фикатталған. Азықтық тауар­лардың қауіпсіздігі жөніндегі СТ РК ИСО 22000-2006 және СТ РК 1733-2007 сертификаттары талаптарына сай сүтті 120 сағат, ал айран, қаймақ, сары май, сыр, ірімшік пен сүзбені 7 тәу­­лік бойы алаңсыз сақтай ала­сыз. Сапа менеджментінің халық­аралық негіздерге сай келуі шаруа­шы­лықтың әлемдік деңгейдегі өнім шығаруына мүмкіндік ашып отыр. Айналып келгенде, жоғарыда аталған сертификаттар жиынтығы барлық өндірістік және басқару процесін халықаралық ISO 9001:2008 стандарттары талабында жүргізуге кепілдік береді. Иван САУЭР, «Родина» агрофирмасының директоры, Қазақстанның Еңбек Ері. Ақмола облысы, Целиноград ауданы.