Бұл – халқымыз үшін жауапты кезең

Елімізде болып жатқан саяси-эконо­микалық жағдайды, біздер, өнер адамдары да үнемі назарда ұстап отырамыз. Осы күндері ел құлағын елең еткізген Қазақстан халқы Ассамблеясы өкілдерінің президенттік сайлауды мерзі­мі­нен бұрын өткізу туралы ұсы­нысын мен де шын көңілмен қол­даймын. Осы ұсыныстың өзі хал­қымыздың, еліміздің бола­шағына немқұрайлы қарай алмай­тындығының куәсі, Елбасының жүргізіп отырған сарабдал саяса­тына көрсетілген сенім деп біле­мін. Қазақстандағы сан алуан ұлт пен ұлыстардың мәдени-рухани дамуына жағдай жасалып, қазақ халқымен бірлік пен татулықта бір туғандай өмір сүруінің өзі үлкен ақыл-парасаттылықтың нәтижесі. Бүгінде егеменді елімізді бүкіл әлем мойындап отыр. Елбасының кемеңгерлігі мен ерік-жігерінің нәтижесінде еліміз талай қиын кезеңдерден өтіп, дамыған, іргесі берік, беделді мемлекетке айналды. Осы жолда өнер адамдарының өздері де әлемге танылып, Қазақстанды да танытуы – Президентіміздің мәдениет пен өнерге деген ерекше көзқарасы мен қамқорлығының арқасы. Елордада ашылған, ТМД елдері арасында теңдесі жоқ «Астана опера» театры сондай қамқорлықтың бір ерекше көрінісі деп ойлаймын. Осы театрдың жұмысын ұйымдастыру барысында жас мамандарды тартып, олардың біліктілігін көтерудің дүние жүзінің танымал өнер ұжымдарымен шығармашылық байланыс орнату арқылы жүргізілуіне шын жүректен қуанамын. Сондай-ақ, жастарды қоғамның өркен­деп дамуына араластырып, балаларымызды әлемнің танымал білім ордаларынан оқытып жатқанымыздың өзі – ел болашағының кепілі. Президенттік сайлауды мерзімінен бұ­рын өткізу қазіргі әлемді жайлаған эко­но­микалық дағдарыс кезінде еліміздің қи­­налмауының, халыққа ауырт­пашылық түсірмеудің кепілі деп білемін. Бұл – хал­қымыз үшін жа­уапты кезең. Сондықтан да, мен Қазақстан­ның жарқын да бақытты бо­лашағына деген сенім­ді тек қана Ел­ба­сы Нұрсұлтан Назарбаев­тың атымен байланыстырамын. Бибігүл Төлегенова, КСРО халық әртісі, КСРО және ҚР Мемлекеттік сыйлықтарының лауреаты, Социалистік Еңбек Ері.