Батыс Қазақстанда мұнай ұрлағандарға үкім шықты

ОРАЛ. 22 ақпан. Батыс Қазақстан аймағында мұнай өндіру ісімен айналысатын «Жайық мұнай» ЖШС иелігіндегі құбырдан ірі көлемде мұнай ұрланғаны белгілі болып отыр. Бұл туралы egemen.kz тілшісі хабарлады. Бұл отандық фирмаға қарасты құбырдан жымқырылған стратегиялық шикізат меншік иелеріне 42 миллион 500 мың теңге залал келтірген. Осыған орай Орал қалалық соты жымысқы әрекетті іске асырған Ю.Козловқа қатысты үкімді жария етті. Тиісті құқық қорғау органдарынан түскен деректерге қарағанда ол тағы бір мұнай ұрлауды кәсіп еткен К.Боранбаевпен бірге өзара қылмыстық топ құрып, серіктестікке қарасты мұнай өнімдерін ешқандай құжатсыз елміздің өзге өңірлеріне жөнелтіп отырған. Олардың бұл қылмыстары әшкерленіп, тиісті қылмыстық жазаға тартылды. Атап айтқанда, Ю.Козлов Қылмыстық кодекстің тиісті бабы мен тармағына сәйкес мүлкі тәркіленіп, 6 жылға бас бостандығынан айырылды. Оның сыбайласы К.Боранбаевқа да жаза белгіленді. Ол үш жыл жеті ай мерзімге сотталды. Ендігі жерде екеуі де жазаларын жалпы тәртіптегі түзеу колониясында өтейді. Ұрланған мұнай өнімдері үш автокөлікпен тасымалданған. Іс барысында бұл көлік құралдары да тәркіленді. Сот талқысы кезінде К.Боранбаевтан 8 млн. 500 мың теңге ақша табылды. Мемлекеттік айыптаушының өтініші бойынша бұл қомақты сома да мемлекет пайдасына енгізілді. Сот үкімі заңды күшіне енген жоқ. Темір Құсайын. Дерек, сурет: egemen.kz.