Қараша айында қазанмен салыстырғанда азық-түлік емес тауарлар бағасының өсімі 0,9%-ға дейін баяулады, ал азық-түлік өнімдерінің бағасы өткен ай деңгейінде (1%) сақталды. Әлеуметтік маңызы бар азық-түлік тауарларына арналған баға индексі кейінгі төрт апта бойы өзгеріссіз қалып отыр.
Серік Жұманғарин жылыжай көкөністерінің, әсіресе қияр мен қызанақтың маусымдық қымбаттауын ескере отырып, шекарадағы өткізу бекеттерінде түрікмен көкөністеріне шұғыл түрде «жасыл дәліздер» ұйымдастыруды тапсырды. Бұл шара, әсіресе, жылыжай өндірісі жеткіліксіз аймақтарды қолжетімді бағадағы көкөністермен тұрақты қамтамасыз етуге бағытталған.
Жаңа жыл мерекесі қарсаңында, яғни 22–31 желтоқсан аралығында елдегі супермаркеттерде «Bereke fest» акциясы басталады. Акция аясында фермерлерден тікелей жеткізілген әлеуметтік маңызы бар тауарлар арзандатылған бағамен сатылады. Сонымен қатар өңірлерде ауыл шаруашылығы және жаңажылдық жәрмеңке саны артады. Желтоқсан айында еліміздің барлық өңірінде 800-ден астам жәрмеңке өткізіледі. Тек өткен аптада 149 жәрмеңке ұйымдастырылды. Сауда комитетіне шалғай аудандарға, оның ішінде Маңғыстау, Ұлытау облыстарына тауар жеткізуге көмек көрсету тапсырылды. Облыста күрделі логистика мен әлеуметтік маңызы бар азық-түлік тауарларын сақтауға арналған қоймалар тапшы. Осыны ескере отырып, Серік Жұманғарин өңірде логистикалық орталық құру міндетін қойды. Аталған орталықтың қуаты азық-түліктің қажетті қорын сақтауға, логистикалық шығындарды қысқартуға әрі өңірлік тарату хабын қалыптастыруға мүмкіндік береді.
Ауыл шаруашылығы вице-министрі Ермек Кенжеханұлы әлеуметтік маңызы бар азық-түлік тауарлары бағасын тұрақтандыру тетіктері бойынша қолданыстағы ережелерге толықтырулар енгізу жұмысы туралы баяндады.
Өзгерістер онлайн мониторинг жүйесін орнатуды міндеттейді. Қазір «Қазақтелеком» АҚ Қызылордада 3 мың шаршы метрлік қоймада қанатқақты жобаны жүзеге асырып жатыр. Келесі жылы әлеуметтік кәсіпкерлік корпорациялардың қоймалары осындай жүйелермен жабдықталады. Бұл әлеуметтік маңызы бар азық-түлік тауарлардың қорын жинақтауға, оның сапасын сақтауға мүмкіндік береді. Өзгерістер жақын арада күшіне енеді.
