Түрікменстан кәсіпкерлері елінен қашып жатыр

АСТАНА. 23 наурыз. Үстіміздегі жылдың наурыз айының басында Түрікменстанның ірі кәсіпкерлері отбасыларымен бірге елден бой тасалады. Олардың басым бөлігі Біріккен Араб Әмірлігінен, қалғандары Түркия мен Ресейден үй сатып алған. Бұл туралы chrono-tm.org хабарлады. Тарата айтар болсақ, кәсіпкерлердің бірі Түрікменстанда жұмыс істеу мүмкін емес дейді. Себебі, ел президентінің туыстары ірі-ірі компаниялардың жұмысына кедергі келтіріп, бизнес саласында олардың табыстарын өз бақылауларында ұстағысы келетін көрінеді. Сондай-ақ, әлгі азамат: «Мен салық төлеуден теріс айналдым. Өйткені, олардың ақшаға деген тәбеттері күн сайын емес, сағат сайын артып барады. Елде қаржылық шиеленіс, салық төлемдерінің өсуі анық байқалып отыр. Кәсіпкерлердің дерлігі шығынға батты. Мұнда ешқандай болашақ жоқ. Шетелдік ірі компаниялардың елден тез кетуі бекер емес», – депті. Айта кетейік, әзірге елден шығып кеткен 6 кәсіпкердің аты белгілі болып отыр. Алайда, бұлардан бөлек қанша бизнесмен Түрікменстаннан кеткенін ешкім дөп басып айта алмауда. Олардың арасында мемлекетпен және Polimeks, Halliburto секілді танымал фирмалармен әріптестік байланыс орната отырып, елге құрылыс техникалары мен материалдарын, мұнай және газ қондырғыларын тасымалдаушы құрылымдардың жетекшілері бар. Талғат Райымбек. Дерек, сурет: chrono-tm.org.