Маңғыстауда мұнай өңдеу зауытын салу мәселесі айтылды

АҚТАУ. 23 ақпан. Маңғыстау облысы – мұнай өңдеуші зауыт құрылысы үшін таптырмас орын. Есеп беру кездесуінде аймақ басшысы Алик Айдарбаев осылай деді. Бұл туралы egemen.kz тілшісі хабарлады. «Қазіргі таңда елімізде 4-ші мұнай өңдеу зауытын салу күн тәртібінде тұр. Еліміздегі бірқатар өңірлер бұл зауыттың өз аумақтарында болғанын қалайды. Мұндай зауытқа мекен болуға Маңғыстаудың да мүмкіндігі мол. Тұтынушылардың дені орталық пен оңтүстікте орналасқан, сондықтан Маңғыстаудың қашықта орналасуы басты себептердің бірі. Жаңа МӨЗ экспортқа бағытталуы керек десек, біздің осы тұста артықшылыққа иеміз. Иран елімен көрші, инвестициялық тартымдылығы жаңа деңгейге көтерілген, теңіз жағасында орналасқан, жаңа порттар, теміржол құрылысы өркендеу үстіндегі Маңғыстаудан қолайлы өңір Қазақстанда жоқ, – деген А. Айдарбаев, зауыттың Парсы шығанағы мен Еуропа елдеріне жеткізілетін мұнай өнімдерінің экспортын дамытуға мүмкіндік беретіндігін айтты. Сондай-ақ, әкім жаңа мұнай өңдейтін зауытты бюджет қаржысына емес, инвестиция тарту арқылы салу қажеттігін алға тартты. Мұны өзге тараптардың қызығушылығын арттыруы мүмкін екендігімен түсіндіре келе, қазірдің өзінде Қытай мен Иран елінің аталмыш құрылысқа қызығушылық танытып отырғандығын жеткізді. Гүлайым Шынтемірқызы. Дерек, сурет egemen.kz.