Маңғыстауда Мұқағали, Шәмші, Төлеген атты үшем туылды

АҚТАУ. 23 ақпан. Маңғыстауда дүниеге келген үшемге Мұқағали, Төлеген және Шәмші деген есімдер берілді. Бұл туралы egemen.kz тілшісі хабарлады. Маңғыстау облыстық перинаталдық орталығында өмірге келген үшемнің жалпы салмағы 5 кг. құраған. Бір жарым ай дәрігерлердің бақылауында болған ұлдар мен анасының қазіргі жағдайы жақсы, сондықтан босану үйінен шығарылып, өз үйлеріне – Бейнеу ауданына жол тартты. Бұған дейін 13 жастағы ұл өсіп жатқан шаңыраққа қосылған үш ұлға туыстары қазақтың белгілі тұлғалары Мұқағали және Төлеген ақындардың, сондай-ақ Шәмші сазгердің есімдерін еншілетті. – Сәбилер кесері тілігі арқылы алынды. Қазір сәбилердің де, 40 жастағы анасының да жағдайы жақсы, – дейді Маңғыстау облыстық перинаталдық орталығының директоры Жамал Жаманбаева. Гүлайым Шынтемірқызы. Дерек, сурет: egemen.kz.