Қостанайда «Масленица» мерекеленді

ҚОСТАНАЙ. 23 ақпан. Қостанайда «Масленица» халықтық мерекесі тойланды. Орталық алаңға қысты шығарып салып, көктем нышанын көруге жүздеген қостанайлықтар жиналды. Бұл туралы kostnews.kz хабарлады. Масленица – қыс қаһарының азайып, көктем шуағы біліне бастағанына адамдар қуанышын білдіретін ежелгі халықтық мереке. Бұл мерекенің ежелден терең философиялық мәні бар. Өмір адамға күреспен келетінін білдіреді. Мереке қаһарлы қысты қымтырылып өткізген соң, аяздың сынып, күннің көтеріліп, шуағын молайта бастағанына қуанған адамдар көңіл-күйін білдіреді. «Масленица» мерекесінде халықтық дәстүрлер, халықтың болмысы көрінеді. Дәмді де, майлы құймақ мерекенің басты белгісі, қыстың кеткенін қуыршақ-тұлып өртеумен сипаттайды. Ал христиан діні ұстанушылар үшін құймаққа тоятын аптадан кейін үлкен пост басталады. «Масленица» мерекесінде арқан тарту, гір көтеру, сыпырғы ұру, жалмауыз кемпірді сүю, таға өлшеу секілді түрлі халықтық ойындар ойналды. Үлкен-кіші құймаққа тойып, ойын ойнап, аязды қысты дуылдатып шығарып салды. Нәзира Жәрімбетова. Дерек, сурет: kostnews.kz.