Ақпараттар ағыны  

*Елімізде нан және ұн өнімдерінің бағасын тұрақтандыру шаралары қолға алынды. Осы мақсатта Азық-түлік келісімшарт корпорациясы қабылданған ме­морандумдар негізінде өңір­лерге 738 мың тонна астық жөнелтуді жоспарлап отыр. Айта кетейік, 2015 жылдың қаңтарынан бері аймақтарға 18 мың тонна бидай жеткізілген. * «Самұрық-Қазына» Ұлт­тық әл-ауқат қоры» АҚ биыл 17 активті жеке­ше­лендіреді. Қор басқарма төрағасының орынбасары Елена Бахмутова «ҚазТрансГаз Аймақ» АҚ, «Алатау Жарық ком­паниясы» АҚ, «Алматы электр стансалары» АҚ, «Ал­­­маты Энерго Сбыт» ЖШС, және тағы басқа да ірі ком­паниялар сатылымға шығарылатынын мәлімдеді. * Астанада дәс­түр­лі «Қамқорлық» респуб­ликалық акциясы қоры­тындыланды. Білім және ғылым министрлігінің бастамасымен өткізілген шара барысында табысы төмен және көп балалы отбасыларынан шыққан 2 307 балаға жалпы сомасы 21 млн. 717 мың теңгеге көмек көрсетілді. Мұның 16 млн. 528 мың теңгесі бюджет есебінен қаралса, демеушілер 5 млн. 189 мың теңге берген. *Алматы облысындағы «Уыз май Industry» ЖШС бір маусымда 16,8 тон­на соя өндіре алады. Серік­тес­тік басшысы Ербол Тоқта­ғұ­ловтың айтуынша, зауыт заманауи құрылғылармен жабдықталған. Көксу ауданы Теректі ауылында орналасқан кәсіпорын облыстың «Индус­трияландыру картасына» енгізілді. * Шымкенттегі K.AZ TEL кәсіпорны жылына ұзын­дығы 8 млн. шақырым сымтемір шығарады. Оңтүс­тік Қазақстан облысы әкімдігінің баспасөз қызметі мұнда кабельдің 100-ден астам түрі, жез бен алюминий сымдары жасалынатынын жеткізді. Аталған өнімге нарықта сұраныс бар. Құрылым «Даму» кәсіпкерлікті дамыту қорының қолдауымен 158 млн. теңге несие алған. * Петропавлда ЖЭО-2 стансасының қуатын арт­тыру үшін жаңғырту жұ­мыс­тары жүргізілуде. Солтүстік Қазақстан облысының әкімі Ерік Сұлтановтың сөзіне қарағанда, биыл №1 және №5 турбиналарды ауыстыру, №12 қазандық агрегатын қайта жөндеу ісі басталған. Бұл шаралар стансаның белгіленген қуатын 25 пайызға ұлғайтады. * Ақтауда нан Германия технологиясымен пісіріледі. Қаладағы «Приозерный-3» кентінде бір жарым жылда салынып біткен MAGA BREAD наубайханасы жұмыс істеп жатыр. Оның қуаты тәулігіне 50 тонна өнім шығаруға же­теді. Кәсіпорын нан-тоқаш өнім­дерімен бүкіл шаһарды қамтамасыз ете алады. Мұнда толық штатта 160 адам бар. Наубайхананың сметалық құны – 2 млрд. теңге. Хабарлар Үкімет, облыстық әкімдіктер сайттары мен «ҚазАқпарат» агенттігінің деректері бойынша дайындалды.