«Ел мықты болса, ел ағасынан, үй мықты болса, бел ағашынан»

Қазақстан халқы Ассамблеясы Кеңесі мүшелерінің әлемдегі, сондай-ақ, еліміздегі қалыптасып отырған экономикалық жағдай­ларға байланысты ахуалды ескере келіп, Қазақстан Президентін мерзімінен бұрын сайлау туралы және бұл сайлауда Мемлекет басшысы Нұрсұлтан Назарбаевқа жаңа президенттік мандат беру жайлы үндеуі дер кезінде жарияланып отыр деп санаймын. Рас, қазіргідей дүние аласапыран болып, дағдарыс деген тажал әр ел­дің жағасынан алып жалаңдап отыр­ғанда, халық оған қарсы бола қоймас. Екіншіден, төрткүл дүниеде болып жатқан соғыс атаулыны, бүлікшілікті көріп, бір күн аш, бір күн тоқ отырсақ та, тыныштық өмірдің бағасын білеміз. Ал сол тыныштық, бейбіт өмірге дәнекер болып, жарғақ құлағы жастыққа тимей, сырттағы және іштегі ахуалды да реттестіріп, соған ұйытқы болып отырған кім? Әрине, Елбасы. Ал мен неге қолымнан келгенше Назарбаевты қолдаймын? Неге сайлаудың ерте өтуіне мүдделімін?!. Қазақ айтады емес пе: «Ел мықты болса, ел ағасынан, үй мықты болса, бел ағашынан» деп. Шынтуайтына келгенде, Назарбаев – білгір, дана, көреген, алдын болжай алатын, ешкімді бөліп-жармайтын, баршаның баласын бауырына басқан қазақ болса, сол қазақтық рухтағы бү­гін­гі таңдағы Көшбасшымыз. Ол бірде-бір ұлттың өкілін алала­май, теңдікте ұстап, еліміздегі ынты­мақты, тұрақтылықты, туыстықты, татулықты сақтап, ту етіп отыр. Еш уақытта еліміздегі достық, бірлік, ынтымақтың шекарасы бұзылмасын. Оның барлығына ұйытқы болып отырған менің қазағым екенін ешкім ешқашан ұмытпауы керек. Ал соның бәрін жүйеге келтіріп, ұқсатып, бөлмей-жармай ұстаған Мемлекет басшысы Нұрсұлтан Назарбаевтың керемет кемел саясаты, ерен еңбегі. «Халық Құдайдан бір жас кіші» деген. Мен – ел ішін көп аралап, халықпен етене араласып жүрген адаммын. Елдің пейілін, пікірін білемін. Сондықтан, ха­лық­тың пікірімен, халықтың ойымен санасып, Мәңгілік Еліміздің көшбасшысын – Елбасымызды осындай жолмен сайлап алсақ, құба-құп болар еді.  Асылы ОСМАНОВА, Қазақстан халқы Ассамблеясының мүшесі, Қазақстанның еңбек сіңірген қайраткері. АЛМАТЫ.