Экономикалық аймақтар еркін дамиды

Кеше Орталық коммуникациялар қызметінде «KAZNEX INVEST» АҚ басқарма төрағасының орынбасары Алмас Айдаров елімізге келіп жатқан инвестицияларға қатысты баспасөз мәслихатын өткізді. Арнайы экономикалық аймақтардың қызметі жөнінде әңгімелеп, онда орын алып жатқан өзгерістер туралы айтты. Мемлекет басшысының сала­ға қатысты жүктеген тапсыр­ма­­ла­­ры­ның орындалу барысын жет­­кізген төраға орынбасары елі­мізді индустрияландыру бағдар­лама­сының жүзеге асырылуын баяндады. «Индустриялық-инновациялық дамудың мем­лекет­тік бағдарламасының бірін­ші бесжылдығында АЭА инфра­құрылымына бұған дейінгі 9 жылмен салыстырған мемлекеттік инвестиция 2 есеге көп салынды. Нақты сандарға сүйеніп айтар болсақ, бұл игі іске 148,3 млрд. теңге тартылыпты. Мамандардың сөзіне илансақ, осынау шара инвесторлардың белсенді әрекет етуіне өз әсерін тигізген. Сөйтіп, алдыңғы 9 жылмен салыстырғанда инвестиция 7,5 есеге дейін көп тартылып, 336,1 млрд. теңгені құрады. Нәтижесінде өндіріс көлемі 5 есе­ге өсіп, 677,7 млрд. теңгеге жет­ті. Ал жұмыс орындарының саны 4,5 есеге көбейіп, 7433 адам тұрақты жұмыспен қамтылды»,  деді А.Айдаров. Жалпы арнайы экономикалық аймақтарды дамыту кезең-кезе­ңі­мен жүріп жатыр екен. Қазіргі кезде жүзеге асырылған 126 жобаның 111-і жобалық қуаттылығы бо­йынша 50 пайыздан асып үлгеріпті. Жақын арада жалпы сомасы 2,3 трлн. теңгенің 50 жобасын пайдалануға беру көзделіп тұр. Осы­ған орай арнайы аймақтарда қосымша 17 мың тұрақты жұмыс орны құрылады. Осы жағымды жаңалықтарға тоқталған спикер, Үде­мелі индустриялық-иннова­циялық мемлекеттік даму бағ­дарламасының алғашқы бесжыл­дығында ел аумағында тағы 4 жаңа арнайы экономикалық аймақ салынғанын атап айтты. Олар – «Сарыарқа», «Павлодар», «Тараз химиялық паркі», «Қорғас – Шығыс қақпасы». Қазіргі таңда аймақтар аумағында инфрақұрылымдық жұмыстар қызу жалғасын тауып жатыр. Өзге де арнайы аймақтардың жұмысы жөнінде айтып өткен төраға орынбасары салаға қатысты заңнама жетілдіріліп, бірқатар түзетулер мен толықтырулар енгізілгенін жеткізді. Қоғамның жаңа ұсынысы Үкіметтен қолдау тауып, қазіргі кезде Парламент Мәжілісінің қарауына түсіпті. «Бұл заң қабылданар болса, осы бағытта қызмет етіп жүрген көптеген мекемелердің қызметі үйлестіріліп, жұмыс барысы бір орталықтан жүйеленіп отырылатын болады. Қазіргі күнде әр аймақтың өз әкімшілігі бар. Әрқайсысы өз білуімен жұмыс істеп ке­леді. Біздің пайымымыз бойын­ша бұл тірлік аса тиімді емес. Мәсе­лен, біздің ұсынысымыз іске асырылып жатса, бір аймақтың қызметкерлері жұмысты тиімді жүргізу әдісін озық елдерден үйреніп келсе, ол тәжірибесін өзге де әріптестерімен бөліседі. Сөйтіп, әрқайсысының шетел мамандарына жүгінуіне қажеттілік болмай, мемлекет ақшасы үнемделетін болады. Жаңа басқару жүйесінің осыған ұқсас бірнеше тиімді тұстары бар», деді ол. Арнайы экономикалық аймақ­тардың жұмысына еркін және арнайы аймақтарды басқару мен ке­ңес беруде көпжылдық тәжіри­бесі бар әлемдегі ірі компанияларды тарту да көзделіп отыр екен. «Арнайы экономикалық аймақтардың жұмысына еркін және арнайы аймақтарды басқару мен кеңес беруде көпжылдық тәжірибесі бар әлемдегі ірі компанияларды тартуды мақсат еттік. Мысалы, былтыр «Jurong Consultants» халықаралық компаниясының қатысуымен «ПИТ» арнайы экономикалық аймағында озық жоба ретінде басқару үлгісін дайындай бастадық. Бұл бағыттағы жұмыс жалғасып жатыр», деген А.Айдаров, отандық АЭА жұмыстарына, сондай-ақ, DP World, Shamrock, Tony Blair Associates, IDI, FEMOZA сияқты компаниялардың тәжірибелері де тартылып жатқанын айтты. Нұрбай ЕЛМҰРАТОВ, «Егемен Қазақстан».