ФИФА нәсілшілдікпен күрестің жаңа жүйесін таныстырды

АСТАНА. 12 мамыр. Футболдан 2018 жылы Ресейде өтетін әлем чемпионатында нәсілшілдікпен күрес қатаң жүргізілетін болды. Осы мақсатта ФИФА жаңа жүйенің тұсауын кесті. Бұл туралы interfax.ru хабарлады. Жаңа ережеге сәйкес, ойын барысында жол берілген кемсітушіліктерді тіркеп отыратын арнайы бақылаушылар жұмыс істейді. Нәтижесінде ФИФА өкілдері анықтаған келеңсіздіктер матчтың хаттамасына тіркеледі. Соған сәйкес кінәлі тарап жазаланатын болады. Жаңа жүйенің тұсау кесу рәсіміне Африка құрлығының өкілі, Кот д-Ивуар құрамасы мен Англияның «Манчестер Сити» командасының ойыншысы Яя Туре қатысты. Бұл футболшы бірнеше жыл бұрын Мәскеудің ЦСКА-сында ойнап жүрген кезінде нәсіліне байланысты жанкүйерлер тарапынан талай мәрте кемсітуге ұшыраған еді. Айта кетейік, 2018 жылғы әлемдік доп додасы Ресейдің 11 қаласында орналасқан 12 стадионда өтеді. Футбол тойы өтетін қалалар: Мәскеу, Санкт-Петербург, Калининград, Қазан, Волгоград, Нижний Новгород, Самара, Саранск, Екатеринбург, Ростов және Сочи. Еламан Қоңыр. Дерек: interfax.ru. Сурет: fifa.com.