Кеше Астана қаласының жанындағы 68665-әскери бөлімінде баспасөз қызметкерлерінің төл мерекесіне арналған іс-шара және Ұлы Жеңістің 70 жылдығына орай, Қорғаныс министрлігі ұйымдастырған «Мәңгі есімізде» атты республикалық шығармашылық байқаудың жеңімпаздарын марапаттау рәсімі болып өтті.
Салтанатты шараны еліміздің Қорғаныс министрінің орынбасары, генерал-майор Талғат Мұхтаров ашып, журналистерді кәсіби мерекесімен құттықтап, республикалық байқаудың жеңімпаздарына дипломдар мен бағалы сыйлықтар тапсырды. Ұйымдастыру комитетіне Қазақстанның барлық өңірлерінен шығармашылық байқауға 70 өтінім келіп түскен екен. Байқауға республикалық газет, радио, телевидение және ақпараттық агенттіктердің журналистерінің қолынан шыққан туындылар қатыстырылды. Атап айтқанда, Ұлы Отан соғысының 70 жылдығына байланысты жазылған екінші дүниежүзілік соғыстың тарихына қатысты тың деректер, майдангерлер мен тыл еңбеккерлерінің жанқиярлық ерлік шежіресі, ұрыс алаңында қаза болғандарды іздеу туралы материалдар сараланды. Мемлекеттік және орыс тілдерінде келіп түскен шығармалардың жеңімпаздары 5 номинация бойынша анықталды.
Сөйтіп, «Баспасөз басылымдарындағы үздік шығарма» номинациясы бойынша республикалық «Егемен Қазақстан» газетінің шолушысы Жылқыбай Жағыпарұлы және «Екібастұз жаршысы» газетінің журналисі Қанат Алдабаев жеңімпаз деп танылды. «Үздік телесюжет/телебағдарлама» номинациясы бойынша «24.kz» телеарнасының журналисі Жасын Біркенов пен «Мир» телеарнасының журналисі Татьяна Жигунова, «Үздік радиосюжет/радиобағдарлама» номинациясы бойынша «Қазақ радиосының» тілшісі Мәдина Ишанова және «Тенгри FМ» радиосының тілшісі Ирина Лелявская жеңіп шықты. «Интернет-басылымдардағы үздік жарияланым» номинациясында «Казинформ» ақпарат агенттігінің журналисі Мұрат Жакеев пен «Tengrinews.kz» интернет-порталының журналисі Батыр Қазыбаев, ал «Үздік фотоочерк/фоторепортаж» номинациясы бойынша «Казахстанская правда» газетінің фототілшісі Юрий Беккер жеңімпаз атанды.
Сонымен бірге, «Мәңгі есімізде» республикалық шығармашылық байқауының қорытындысын шығару комиссиясы азаматтық белсенділігі үшін жеке шығармаларға арнаулы номинация тағайындады. Осы номинация бойынша Қорғаныс министрінің арнайы дипломдарымен және бағалы сыйлықтарымен «Егемен Қазақстан» газетінің ардагер журналисі Ержұман Смайыл, Ақтөбе облыстық газетінің тілшісі Өтеміс Әкімов, «24.kz» телеарнасының журналисі Дмитрий Олейников және «Қазақстан» телеарнасының журналисі Ернұр Нұрғалиев марапатталды.
68665-әскери бөлімінде өткен салтанатты рәсім Қорғаныс министрлігі Орталық ансамблі әртістерінің мерекелік концертіне ұласты. Сонымен бірге, мерекелік шараға жиналған журналистер дала асханасында сарбаздар дастарқанынан дәм тәтті.
«Егемен-ақпарат».
