Хосеп Гвардиола атақты Зиданды тәрбиелейтін болды

АСТАНА. 25 наурыз. Францияның атақты футболшысы Зинедин Зидан бүгінде жаттықтырушылық қызметте тер төгіп жүр. Алдағы күндері ол біліктілігін арттыру мақсатында Мюнхеннің «Бавариясын» жаттықтыратын Хосеп Гвардиоланың қол астында тәжірибеден өтпек. Бұл туралы eurosport.ru хабарлады. Зидан өзімен бірге Мюнхенге Вилли Саньоль мен Клод Макелелені алып келді. Енді үшеуі Гвардиоланың жұмыс тәсілімен таныспақ. Бірнеше күн испан маманының қасында жүріп олар негізінен жаттығу кезіндегі тактикалық тәсілдерді меңгермек. Бұған дейін даңқты футболшы белгілі жаттықтырушы Марсело Бьелсаның да қол астында тәжірибеден өткен еді. Зидан мен Гвардиолла ойыншы кезінде сан мәрте бір-біріне қарсы алаңға шықты. Ол кезде Зизудың атағы аспандап тұрған еді. Ал жаттықтырушылық қызметте ол Хосеп мырзаның тәжірибесіне мұқтаж. Бүгінде Зинедин Зидан «Реалдың» (Мадрид) екінші командасы «Кастильяның» бас жаттықтырушысы. Аталған команда Испания чемпионатының екінші дивизионында (сегунда) ойнайды. Сондай-ақ, Зиданның 2013-2014 жылдары Карло Анчелоттидің көмекшісі болғаны белгілі. Жанкүйерлер арасында «жақын уақытта «Реалдың» тізгінін Зидан ұстайды» деген пікірлер жиі айтылып жүр. Ендеше даңқты футболшының білікті мамандардан сабақ алуы сол мақсатта жасалған қадамдардың бірі десек те болады. Еламан Қоңыр. Дерек: eurosport.ru. Сурет: planoinformativo.com.