Ата Заң аясында

Біздің Конституциямыз бастауын көне замандардан алатын, бертін келе тарихымыздағы Әз-Тәукенің «Жеті Жарғысы» арқылы көрініс беретін бас­ты құжаттардың бүгінгі келбеті деп ойлаймын. Бұл енді менің қарапайым жұмысшы ретіндегі көзқарасым. Жеке құқық туралы бала кезде мектеп қабыр­ғасында жүріп, аз-кем оқығанымыз болмаса, ел мен жердің құқына қатысты ұғымды қариялардың аузынан естіп, құлаққа құйып алғанбыз. Ал қазіргі Конституцияның адам құқы қорғалуын қамтамасыз ететіндігінен хабарым мол және онда адам құқына қатысты баптар өте көп. Сондықтан, өз құқымның мемле­кеттік тұрғыдан қорғалатындығын жақсы білемін. Мен қазір елордамыздағы Орын­бор көшесін жағалай орналасқан минис­тр­ліктер үйінің алдын жасыл желекпен көмкеріп, абаттандыру ісіне араласып келемін. Астананың көркеюіне өз үлесімді мұрапшы ретінде қосып жатырмын. Яғни, қызметіне сай өзіме тиесілі жерге егілген гүлдер мен ағаштарды, жасыл желекті суарамын. Атқаратын міндетім аса жеңіл болмаса да, жасыма лайық, орындай алуға қауқарлымын. Тағы бір 4-5 жыл еңбек етсек, осы бейнетіміздің зейнетін көреміз. Мен жоғарыда атап өткен құқымның мемле­кеттік тұрғыдан қорғалуының бірден-бір көрінісі сол болу керек. Яғни, жасым жеткенде зейнетке шығып, ұзақ жылдық еңбегімнің рахатын көремін. Оны мемлекет қамтамасыз етеді емес пе?!. Мұны бір деп қойыңыз. Ендігі сөзімді дәйектей түсу үшін өз өмі­рімнен нақты бір мысалдар келтірейін. Біз өзі білімді Кеңес заманында алғандықтан, белгілі бір салаға бейімделіп мамандық алуға мүмкіндік болмады. Десек те, Тәуелсіздік алғаннан кейінгі мемлекетіміздің қалыптасуы біз­дің толқын өкілдеріне бірқатар ауырт­­палықтар түсіріп, жауапкершілік жүк­теді. Ауыртпалығы сол, біз екі заман­ның куәгерлеріндей күйге түстік. Салыс­тырмалы түрде айтар болсам, қазіргі кезде құқыңның қорғалуына мейлінше жағдай жасалған. Оны осы күндері басымнан өткеріп жүрген мынадай жағдаймен айғақтай аламын. Менің Қазақстан Республикасының азаматы болып табылуым – осы елдің ең басты байлығының бір бөлшегі екендігім. Осыны өте жақсы сезінемін және түсінемін. Ал бұл, өз кезегінде менің Конституциялық құқымның қорғалуына кепілдік беріле­тіндігін айғақтайды. Енде­ше, осы азамат­тық құқым­ның қорғалуынан туындайтын әлеу­меттік-тұрмыстық жағдай­ларым­ның түзелуін тарқата айтып берейін. Белгілі бір заң саласында оқыған-тоқы­ғаны бар маман болмасам да, азамат ретінде қорғалуым керектігін логи­калық тұрғыдан сеземін. Қызылорда облы­сының Жаңақорған ауылында туып, өсіп ұзақ жылдар еңбек еттік. Өт­кен жылға дейін Кеңестік жүйедегі сов­хозымыздан қалған шаруашылықтың шашауын шығармай-ақ ұстап келдік те, ақылдаса келе, мүлкі мен техникасы жоқ, есесіне, гектарлап жатқан жері бар қожалығымызды бөліске салдық. Алайда, ол жерде маған және менің төрт баламнан тұратын отбасыма тиесілі үлесім тимей қалды. Ал ауыл іргесінде әлі де болса бөліске салынбаған жер жатыр. Біз кетерміз-ау, бірақ, бүгінгі балаларым мен ертеңгі ұрпағымның еншісіне бұйыруы тиіс пайымды бағалай отырып, 2-3 гектар жер болса да алуым керек еді. Ол мүмкін болмағандықтан, қазіргі кезде ауыл мен аудан, облыстағы тиісті мамандармен сөйлесіп, өз үлесімді еншілеуге барымды салып, жүгіріп жүрмін. Тіпті, осы мәселе бойынша өз өл­кемізден сайланған Мәжіліс депу­татының қабылдауында да болып, оның көмекшісімен тікелей байланыста отырмын. Бар мақсатым – ертең зейнетке шыққанда немерелеріме мұра ретінде қалдыратын заңды жерім болса деп ойлаймын ғой. Қазіргі кезде жан-жақты тексеріп, себебін анықтау, түсіндіру, нақтылау жұмыстары жүргізілу үстінде. Оң нәти­жеге қол жеткіземін деген үміт­темін. Ал егер болмай жатса, Елба­сы­ның атына хат жазып, араша сұрау да ойымда жоқ емес. Бұл менің ел аза­маты әрі қарапайым жұмысшы ретін­дегі өз ойым. Өйткені, маған Ата Заңы­мыз осын­дай мүмкін­діктер береді. Жауап­ты ведомстволар мен тиісті құзырлы орган­­дарға арыз, шағымыңды айта оты­­рып, өз құқыңды қорғайсың. Егер олар­­дың жұмысына көңілің толмаса, тіпті, Пре­зидентке дейін хат жазып, өз құқың­ның қорғалуын қамтамасыз ете ала­сың. Біздің Конституциямыз азамат­тарға осындай мүмкіндіктер береді. Салыстыра отырып, саралап көріңіз енді, Кеңес заманында осындай мүмкіндіктер болды ма өзі?!. Құралбай СӘРСЕНОВ, «Астана көгалдандыру» АҚ мұрабы.