Дүбірлі додада елордалық Nomad Table Tennis Academy шәкірттері оқ бойы озық шығып, жоғары дайындықтарын паш етті. Академияның тәрбиеленушісі Нұрислам Қасым жекелей сында қарсылас шақ келтірмей, Қазақстан чемпионы атанды. Жас дарын шешуші сәттерде кәсіби деңгейі мен темірдей төзімін дәлелдей білді.
Жеңіс тұғырынан академияның тағы бір шәкірті Қадырәлі Қабдылуахитов та көрінді. Ол жекелей сында қола жүлдені місе тұтып, турнир бойы тұрақты әрі сенімді ойын өрнегін көрсетті.
Айта кетейік, Nomad Table Tennis Academy – Астанадағы жас спортшыларды халықаралық деңгейге дайындайтын заманауи академиялардың бірі. Мұнда әлемдік турнирде тәжірбиесі бар кәсіби жаттықтырушылардың жетекшілігімен жүйелі дайындық жүргізіліп, спортшылардың техникалық, тактикалық және психологиялық дамуына ерекше көңіл бөлінеді. Осы чемпионаттағы нәтижелер академия жұмысының тиімділігін тағы бір мәрте дәлелдеді.
