«Тұрмысымыз көршілерімізден де, қалалықтардан да жақсы. Ауызсу, жарық, жол, газ сынды инфрақұрылымдық мәселелер толық шешімін тапқан. Жалпы, кейінгі жылдары көптеген мәселе шешімін тауып, ауыл тұрғындарының тұрмысы жақсара түсті. Тұтынатын ет-сүт те, көкөніс те, жалпы азық-түліктің барлығы өзімізде өндіріледі. Яғни табиғи өнімді тұтынамыз, қалалықтардан жақсы тұрамыз дейтінім де сондықтан. Бұл игіліктің барлығы, әрине, еңбектің, мемлекет қолдауының, іскер аудан әкімінің, жергілікті биліктің жүйелі жұмысының нәтижесі», дейді Жібек жолы елді мекенінің тұрғыны Қыдырбаев Нұрмат.
Бүгінде Қазақстан-Өзбекстан шекарасындағы «Жібек жолы» өткізу бекетінде реконструкция жұмыстары жүргізіліп жатыр. Жергілікті тұрғындарды жұмыспен қамтуда бұл нысанның алар орны да ерекше. Сондай-ақ 2026 жылға арналған жоспарға сәйкес, тұрғындар тарапынан көтерілген ұсыныстар негізінде елді мекендегі кіші футбол алаңын ағымдағы жөндеуден өткізуге жергілікті бюджеттен қаржы бөлінді. Көше бойына воркаут және балалар ойын алаңқайы салынады. Ауылдар абаттандырылып, жөндеуден өткен көшелер жарықтандырылған.
«Әкім бол, халқыңа жақын бол», деген ескіден қалған есті сөз бар. Бұл ұлағатты сөз басшылардың бұқарамен санасып, әлеуметтің мұң-зарыңа құлақ салуы керектігін ұғындырады. Осы орайда жұмыс істесем, халықтың көңілін тапсам дейтін әкімнің арамызда жүргені қуантады. Иә, мен аудан әкімі Арман Абдуллаевты айтып отырмын. Осындай іскер әкімнің еңбегін орынды бағалап, қолдап отыруымыз қажет. Әдетте мемлекеттік қызметші көптің көңілінен сәл шықпай қалса, жабылып жамандайтынымыз белгілі. Ал іскер шенеуніктердің нәтижелі жұмысын айтуда сараңдық танытамыз. Аудан әкімінің халықшыл істеріне, байыпты бастамаларына талай рет куә болдық. Бүгіндері де сондай үдеден шығып, халықтың алғысын алып жүр. Әкім болу – әр адамның ісі, ал халқына жақын болу – нар адамның ісі. Сондай нар тұлғалы азамат, ел қамын ойлаған адал жан Арман Абдуллаевқа айтар алғысымыз шексіз», дейді Жібек жолы ауылдық округі ардагерлер кеңесінің төрағасы Н.Қыдырбаев.
Сарыағаш ауданының әкімі Арман Айдарұлы 2023 жылдың қаңтар айынан бастап аудан халқына қызмет етіп келеді. Жергілікті жұрт әкімнің қызметке тағайындалғаннан бастап, ауданға қарасты барлық 62 елді мекенді аралап шыққанын, әрбір елді мекендегі өзекті деген, бірінші кезекте шешуді қажет ететін мәселелерді айқындағанын айтады. Сол бойынша арнайы жоспар жасалып, бүгінде кезегімен орындалу үстінде. Көп мәселе шешімін тапқан. Мысалы, Дербісек ауылдық округі аумағында бірнеше жылдан бері ауызсу мәселесі көтеріліп келген еді. Аудан әкімінің облыс, республика көлемінде тиісті органдарға мәселені дұрыс жеткізе білуінің нәтижесінде 2024 жылы толық ауызсумен қамтылды. Қапланбек ауылындағы Мәдениет үйі 2007 жылы жекеменшікке беріліп кетуіне байланысты туындаған мәселе заңнама талаптарына сәйкес қаралып, мемлекет меншігіне қайтарылды. Жылға елді мекеніндегі ауызсу мәселесі де шешімін тауып, ауыл тұрғындары аудан әкіміне алғысын білдірді. Аудан орталығы Сарыағаш қаласында бірқатар маңызды әлеуметтік және инфрақұрылымдық жоба жүзеге асырылды. Қала аумағында көгалдандыру жұмыстары жүргізіліп, гүлдер мен аршалар егілді, жасыл қоршаулар жаңартылды. Республикалық маңызы бар А-15 автожолы бойына екпе шарбақтар отырғызылды. Шипажайы көп ауданға еліміздің өзге өңірлерінен, шетелден демалуға, емделуге келетіндер көп. Олардың арасында жол бойындағы тазалыққа мән беріп, ризашылықтарын білдіріп жататындары аз емес. Сарыағаштағы Шәмші гүлзары маңындағы жатақхана ауласына балалар ойын алаңқайын салуға бюджеттен қаржы бөлініп, құрылыс жұмыстары толық аяқталды. Сонымен қатар аталған жатақхананың кәріз жүйесі мен санитарлық тораптары жаңартылды. Қала аумағындағы 28 көшеге түнгі жарықшамдар орнатылды. 14 балалар ойын және спорт алаңқайы салынды.
Мемлекет басшысы Қасым-Жомарт Тоқаев Ұлттық құрылтайдың V отырысында Сарыағаш қаласы маңындағы көлік қозғалысының тығыздығын атап өтіп, «Сарыағаш айналма жолы» жобасын жүзеге асыруды тапсырған болатын. Биыл құрылысы басталатын айналма жолдың жалпы ұзындығы – 102 шақырым. Жобалау-сметалық құжаттаманың құны – 238,1 млрд теңге. Сондай-ақ Президенттің тапсырмасына сәйкес көпбейінді аурухана мен перзентхана салынып жатыр. «Самал-3» шағын ауданында жаңадан қосылған тұрғын үйлерді ауызсумен қамтамасыз ету мақсатында республикалық бюджет пен Ұлттық қор есебінен 800 млн теңге қаржы бөлініп, құрылыс жұмыстары жүргізілуде. Кезекте тұрған азаматтарды кезең-кезеңімен баспанамен қамту мақсатында өткен жылы 48 кредиттік пәтер сатып алынып, оларды биыл табыс ету жоспарланып отыр. 2026 жылға жоспарланған жұмыстар қатарында Шымкент-Шыназ А-15 автожолы бойын абаттандыру және көгалдандыру, қала аумағында 8 балалар ойын алаңқайын, 1 воркаут және 2 спорт алаңшасын орналастыру көзделген. Аудан тұрғындары осындай игілікті де нәтижелі істерді Арман Абдуллаевтың іскерлігімен, ұйымдастырушылық қабілетімен байланыстырады.
Бүгінде халқының саны 223 мыңға жуықтаған ауданда этнос өкілдерінің мүддесін қорғайтын, мәдениетін насихаттау мақсатындағы 6 этномәдени орталық (өзбек, тәжік, әзербайжан, ұйғыр, түрік, неміc) жұмыс істейді. Этнос өкілдері шоғырланған 7 ауылдық округте жеке іс-шаралар жоспары жасалып, жүзеге асырылуда.
«Аудандағы этномәдени орталықтары қоғамдық жұмыстарға, іс-шараларға белсене қатысып, ел бірлігі мен татулығын нығайтуға үлестерін қосып келеді. Аудан әкімі Арман Абдуллаевтың шынайы қамқорлығының, қолдауының нәтижесінде орталық жетекшілерінің алаңсыз жұмыс істеуіне барлық жағдай жасалған. Этно-мәдени орталық мүшелері бас қосып, алдағы атқаратын міндеттеріміз бен жоспарланған шаруаларымызды кеңінен талқылап отырамыз. Осы орталық жетекшілері атынан аудан басшысына алғысымызды айта отырып, ортақ Отанымыз болған қазақ жеріндегі достық пен бірліктің нығаюына, қоғамдық келісімнің салтанат құруына атсалыса береміз», дейді түрік этномәдени бірлестігінің төрағасы Алипаша Хинизов.
Ал Құркелес ауылдық округі тұрғыны Балтабай Төлегенов елді мекендерде ФАП салынып, жол жөнделіп, электр бағаналары ауыстырылғанына тоқтала келе, Арман Абдуллаевтың халықтың алдында өзін-өзі ұстау мәдениеті жоғары екенін, қордаланған мәселелердің себептерін жан-жақты жеткізе алатынын айтты.
«Өз ісін кәсібилік, біліктілік және зор жауапкершілікпен атқарып жүрген, «бәрі де елге болсын» деген ниетпен күн кешіп, қашанда халық арасынан табылатын аудан әкімінің тұрғындар алдында абыройы асқақ. Осындай басшылардың қатары көбейе түссе, мемлекеттік қызметшілерге деген халықтың сенімі де күшейеді», дейді Тегісшіл ауылдық округінің тұрғыны Ануар Қосназаров.
Арман Абдуллаевтың ауылдардағы мәселелермен танысу, оны шешудің жолын қарастыруда қарапайым халықтың пікірін әрдайым ескеретінін айтушылар да көп. Жергілікті жұрт жақсы пікір айтып, жұмысын бағалаған әкімнің өзі басқаратын ауданның түкпір-түкпірін аралап, тұрғындармен жиі жүздесуі көп шаруаның нәтижелі атқарылуына септігін тигізгені анық.
Түркістан облысы
