Мемлекет басшысы Нұрсұлтан Назарбаев елордадағы «Сарыарқа» велотрегінде Наурыз мейрамына орай өткен мерекелік шараға қатысты.
Мерекелік театрландырылған қойылым «Жаңғырған табиғат, бақ қонған ел», «Қазақстан – нұрлы жол!», «Астана – Мәңгілік Елдің ортасы», «Наурыз – нұрлы жол» атты төрт бөлімнен құралды. Шарада белгілі қазақстандық өнерпаздар ән шырқап, би биледі.
Елорда тұрғындары мен қонақтары алдында сөз сөйлеген Нұрсұлтан Назарбаев барша Қазақстан халқын Наурыз мейрамымен құттықтады.
– Құрметті қауым, қазақстандықтар, отандастар, баршаңызды әз Наурыз мейрамымен шын жүректен құттықтаймын. Біздің бұл мерекеміз – ата-бабамыздан келе жатқан үлкен мереке. Көп мемлекеттер бұл күнді жаңа жыл деп санайды. Біздің тарихымызда бірнеше жүз жылдан бұрын атап, көктемнің алғашқы күнінде ағайындар бір-бірімен қауышып, туысқандар бірін бірі қыстан шығып көріп, барлық орын алған жаманшылықтарды кешіріп, бір-біріне көмектесіп, наурыз көже үлестіріп жататын. Біз еліміздің ақ тілекпен, бірлікпен тәуелсіздігін орнаттық. Қазақстанды дүниежүзіне белгілі мемлекет еттік. Қандай қиын-қыстау заман болса да бірге болып, бірлігімізден ажырамай, алға басып келе жатырмыз. Еліміз көркейді, ел ордасы – халықтың, мемлекеттің жүрегі бүкіл дүниежүзіне белгілі болды, – деді Елбасы.
Мемлекет басшысы еліміздің болашақтағы бағдарының да белгілі екендігін атап өтті. «Қиындықтарға қарамастан, біздің халқымыз әрдайым тұтастығын сақтады және алға қарай сеніммен жүріп отырды. Әлемде дағдарыс көріністері байқалып отырған қазіргі кезде де Қазақстанның оларды еңсеруге қажетті ресурстары жеткілікті. Біздің еліміз өзінің бұдан әрі дамуының жоспарларын, соның ішінде «Қазақстан-2050» Стратегиясын, «Нұрлы Жол» бағдарламасын, жаңа әлеуметтік және инфрақұрылымдық нысандардың жобаларын әзірлеп, жүзеге асыруда. Осының бәріне халықтың бірлігі, бір-біріне деген құрметі мен сенімі, елдің тұрақтылығы қажет. Егер біз таңдаған жолымыздан ауытқымай жүретін болсақ, Қазақстанның болашағы бұдан да жарқын болады. Табысты болайық, аман болайық. Наурыз қуаныш, бақыт, береке алып келсін!» – деді Нұрсұлтан Назарбаев.
Мерекелік концерттен кейін Мемлекет басшысы «Астана-Арена» стадионының жанынан Наурыз мейрамына арнайы құрылған этноауылды аралап, қала тұрғындарымен жүздесті. Еліміздегі түрлі этностың өнерін тамашалады.
«Бүгін – тамаша мереке. Көктемнің жарқырап тұрған күні. Қыс бітіп, жылу келіп, табиғаттың барлығы тіріліп, барлығы қуанатын кез. Осы кезбен біздің Наурыз деген дәстүрлі, ұлы мерекеміз, Ұлыстың ұлы күні тура келеді. Ата-бабамыздан қалған дәстүр бойынша бұл күні ағайындар бір-бірін кешіріп, бір-бірімен қауышып, жақсылық, береке, бақыт тілейді. Келесі жылға дейін ел аман, жұрт тыныш болсын дейді. Сондықтан, біз де бүгін Қазақстанның барлық түкпірінде Наурыз мерекесін тойлап жатырмыз. Барша Қазақстан халқына сәлемімді жолдап, амандық пен жақсылық тілеймін! Баршамыз болып еліміз аман, жұртымыз тыныш болсын деп тілейтін болсақ, алдымызға қойған мақсаттар мен халықтың болашағына жұмсалатын күш-қуат жүзеге асып, еліміз берекелі болады. Наурыз құтты болсын!» – деді Елбасы этноауылда сөйлеген сөзінде.
Алаңда тігілген отауларда әр этнос өкілдері ұлттық киімдерін киіп, ән шырқап, жұртшылыққа наурыз көже таратты. Сонымен қатар, этноауылға келген қала тұрғындары мен қонақтары ұлттық спорт сайыстары мен ойындарына қатысып, мейрамға орай ұйымдастырылған шараларды тамашалады. Мемлекет басшысы осы этноауылда наурыз көжеден дәм татты.
Динара БІТІКОВА,
«Егемен Қазақстан».
Суреттерді түсіргендер
С.БОНДАРЕНКО, Б.ОТАРБАЕВ.
