ҚОСТАНАЙ. 15 тамыз. Қостанайда «Өзара облыс апталары» бағдарламасы аясында Батыс Қазақстан облысының Мәдениет күндері өтуде. Бұл туралы egemen.kz тілшісі хабарлады.
Батыс Қазқстан облысы мәдениет күндері аясында қостанайлықтар белгілі ақын, Қазақстан Жазушылар одағының мүшесі, Халықаралық «Алаш» әдеби сыйлығының, «Құрмет» орденінің иегері, Қазақстанның еңбек сіңірген қайраткері Ақұштап Бақтыгереевамен оның «Ақ жайық. Ақ шағала. Ақұштап» тақырыбында әдеби кешінде жүздесті. Онда Ақұштаптың өлеңдері оқылды, оның мәтініне жазылған әндер шырқалды.
Қазақстан Жазушылар одағы Қостанай облыстық филиалының директоры Ғұмар Ахметчин: «Академик Зейнолла Қабдолов кез келген ақын туралы айта бермеген. Ол кісі Ақұштап шығармашылығы туралы «Ақұштаптың өзінің поэзия ауылы бар. Сол ауылдың ішінде көптеген отау бар. Әр отауға кірсеңіз поэзияның түрлі-түрлі саласы бар. Ақұштаптың махаббат, бақыт, Отан, ана туралы өлеңдері бөлек-бөлек, қыздың жиған жүгіндей» деп жазған болатын. Біз осыдан артық сөз айта алмаймыз. Бірақ өз піікірімізді білдірер болсақ, Ақұштап Алматыда 40 жыл еңбек етті, сосын Оралға келгеніне де 12 жылдай уақыт болды. Ақұштап Алматыдағы беделін Оралға арқалап келді. Оралда өзінің өлеңімен де, азаматтық қайраткерлегімен де жастардың тәрбиесіне үлес қосып келеді» – деді.
Қостанайдағы «Мирас» мәдениет үйінде ақынның шығармаларынан кітап көрмесі ұйымдастырылды. Мұнан кейін қостанайлықтар Жайық бойы өнерпаздарының концертін тамашалады.
Батысқазақстандықтар Қостанай жұртына «Батыс Қазақстан – Евразия жүрегінде» тарихи-этнографиялық көрмесін ұсынды.
І.Омаров атындағы облыстық драма театрында Батыс Қазақстан облыстық драма театрының ұжымы Шыңғыс Айтматовтың «Жәмила» драмасын ұсынды.
Алдағы уақытта Қостанай облысының Батыс Қаазқстан облысындағы күндері өтеттін болады.
Нәзира Жәрімбетова
Дерек, сурет: egemen.kz.
