А.Байтұрсынов атындағы Қостанай мемлекеттік университетінде өткен «Байтұрсынов оқулары–2015» халықаралық ғылыми-теориялық конференциясы бұл жолы «Нұрлы Жол» даму бағдарламасы: білім-ғылым-өндіріс» тақырыбына арналды. Конференцияға Ресейден, Түркиядан, Қырғызстаннан, Қазақстанның облыстарынан ғалымдар мен магистранттар қатысты. Онда А.Байтұрсынов атындағы Қостанай мемлекеттік университетінің ректоры, ветеринария ғылымдарының докторы, профессор Асқар Наметов «Еліміздің индустриялық-инновациялық дамуы үшін жаңа формацияда мамандар дайындаудың маңызы», Ресейдің Челябі мемлекеттік университетінің оқу ісі жөніндегі проректоры, филология ғылымдарының докторы, профессор Лилия Нефедова «Шет тілі саласында парадигмді ұйымдастыру», Жанбол Жылбаев «Қоршаған ортаны қорғаудан – тұрақты дамуға және «жасыл экономикаға: Қазақстандағы білім беру саласындағы экологизацияның халықаралық мазмұны» жөнінде терең баяндамалар жасады.
Халықаралық ғылыми-теориялық конференцияға қатысушылар дөңгелек үстел мәжілісінде жоғары мектепте білім беру процесінің маңызды мәселелерін қозғады. Сонымен қатар, ғалымдар мен ізденушілер бірнеше секцияға бөлініп, тақырыптар бойынша ғылыми талқылауға қатысты. Бұл конференцияның жылдағыдан ерекшелігі оған ғылым көгіне талпынған магистранттар көп келді. Қазақтың қыздар мемлекеттік педагогикалық университетінің магистранттары Ұлдана Бисенбиева күріш жармасынан спирт алудың технологиялық үлгісін жасауды, Бану Диярова көксағыз өсімдігі құрамындағы амин қышқылдарын зерттеуді қолға алыпты. Магистратураның екінші курсында оқитын олар ғылыми еңбегінің өндіріске енгізілетініне, болашағына сенімді.
Нәзира ЖӘРІМБЕТОВА, «Егемен Қазақстан».
ҚОСТАНАЙ.
