Ұлыбритания үкіметі Чарльз ханзаданың жеке хаттарын жариялады

АСТАНА. 14 мамыр. Ұлыбританияның бұқаралық ақпарат құралдары 10 жылға созылған сот дауынан кейін патшайым Елизавета ІІ-нің үлкен ұлы Чарльз ханзаданың хаттарына қол жеткізді. Аталған хаттар осы елдің үкіметіне бағытталған. Бұл туралы 24today.net хабарлады. Жоғарғы соттың шешімінен кейін 13 мамырда жеті түрлі министрлікке жіберілген 27 хат Ұлыбритания үкіметінің сайтында жарияланды. 2004-2005 жылдары жазылған бұл хаттар сол кездің өзінде баспасөзде біраз айқай-шу тудырған еді. Өйткені, Ұлыбритания монархы елді тек шартты түрде басқарады. Сол себепті патшайым отбасының мүшелері саясатқа араласу құқынан айырылған. The Guardian басылымы ақпарат бостандығы туралы заңға сүйене отырып, 2005 жылы алғаш рет аталған хаттардың мазмұнын ашып көрсетуді сұраған болатын. Газеттің мұндағы басты мақсаты – ханзаданың министрліктерге не жөнінде жазғанын анықтау еді. Содан бастап «болашақ монархтың жеке хаттары туралы жұртшылық білуге міндетті ме?» деген сұрақ төңірегіндегі заң дауы 10 жылға созылды. Мамыр айының соңында Жоғарғы сот хаттарды жариялауға келісім берді. Алайда, Чарльз ханзаданың қорғаушылары бұл шешімге келіспей, қарсы шағым түсірді. Дегенмен, бір күн бұрын апелляциялық палата шешімді өз күшінде қалдырған. Чарльздің ресми өкілдері Ұлыбритания әділет органының шешіміне көңілі толмайтындарын білдірген. Олар «құпиялылық қағидасы бұзылды» дегенді алға тартып отыр. «Бұл хаттардың жариялануы Чарльз ханзаданың қандай да бір сұрақтар бойынша жеке алаңдаушылық білдіру құқын бұзады», – деп мәлімдеді Кларенс-хаустағы Лондон резиденциясында ханзада өкілдері. Еламан Қоңыр. Дерек: 24today.net. Сурет: telegraph.co.uk.