Әкімшілік кедергі – кәсіпкерге тұсау

Еліміздің Дүниежүзілік сауда ұйымына кіруі біраз жылдардан бері айтылып жүрген мәселе болғанымен, Мемлекет басшысы Нұрсұлтан Назарбаевтың тиянақты жүргізіп отырған саясаты, берік ұстанымы нәтижесінде енді ғана мүмкін болып отыр. Осы бір абыройлы ұйымға мүше болу міндет қана емес, үлкен сын екені де жасырын емес. Сондай-ақ, ел кәсіпкерлері үшін бәсе­келестіктің жаңа деңгейге көшуін білдіреді. Сондықтан, отандық кәсіпкерлердің әлем нарығына лайықты бәсекелестік таныту үшін мемлекет тарапынан барлық жағдайлар жасалуы тиіс. Кәсіпкерлерді қолдау – Қазақ­стан Республикасы Мемлекеттік қызмет істері және сыбайлас жем­қорлыққа қарсы іс-қимыл агент­тігінің басты міндеттерінің бірі. Агенттіктің Алматы қаласы бо­йынша департаментінің жанында қоғам мен мемлекеттік органдар арасындағы көпір болып табылатын қоғамдық кеңес жұмыс істейді. Кеңестің құра­мына отандық биз­нес өкілдері, кәсіпкерлік құры­лымдар кіреді. Жақыннан бері қоғам­дық кеңес отырыстарында мем­лекеттік орган басшыларын тыңдау тәжірибесі жолға қойыл­ған. Осындай отырыс­тар бары­сында қоғамдық ұйымдар жүргіз­ген мониторингінің сауалнама нәтижелері таныстырылады. Кеше Алматы қаласы әкімді­­гінде осы қоғамдық кеңес­­тің кезек­ті отырысы болып өтті. Онда «Мем­лекеттік қызмет көрсе­тудің сапасы туралы қоғам­дық мониторингтің нәтиже­лері» деген тақырыпта Алматы қаласы Кәсіпкерлер палатасы дирек­торы­ның орынбасары міндетін уақытша атқарушы Салтанат Лесбаева баяндама жасады. Оның айтуынша, Алматы қаласы бойынша кәсіпкерлер пала­тасы 1334 кәсіпкер арасын­да мониторинг жүргізген. Өт­кен жылғы нәтижелермен салыс­тырғанда, кәсіпкерлердің мемле­кет­тік қызметтер сапасына деген қа­нағаттану деңгейі өскен. Кәсіп­керлер палатасы өткізген 15 мем­ле­кеттік қызмет түрінің 13-і сапа жа­ғынан жақсы нәтижелер көрсеткен. Сонымен қатар, кәсіпкерлер бірқатар кемшіліктерді де атап көрсеткен. Олар: қызмет көрсе­ту­дің ұзақтығы, электронды қыз­меттердің істен шығуы себеп­ті техникалық проблемалар, мем­ле­кет­тік мекемелер мен ХҚО қыз­меткерлерінің дөрекілігі және ұқып­сыздығы, шектен тыс көп құжат­т­арды талап етуі және қызмет көр­сету уақытының ұзаққа созылуы. Дегенмен, көптеген кәсіп­кер­лердің мемлекеттік қызметтердің регламенттері мен стандарттарының бары жөнінде бейхабар екендігі де анықталды. Көптеген кәсіп­кер­лер өздерінің әкімшілік рәсім­дер тер­миндер мен негізгі ұғым­дарды түсін­бейтіндіктерін айтқан. Бұл ба­ғытта кәсіпкерлердің құқық­тық са­уат­­ты­лығын көтеруге бағыт­тал­ған жұ­мысты жандандыру көзделуде. Шарафаддин ӘМІРОВ, «Егемен Қазақстан». Алматы.