Дзюдо. Максим Раков – Азияның күміс жүлдегері!

АСТАНА. 15 мамыр. Кувейтте дзюдодан Азия чемпионаты өтіп жатқаны белгілі. Жарыстың екінші күні Қазақстан қоржынына 1 күміс және 2 қола медаль түсті. Бұл туралы спорттық жекпе-жек және күш қолданылатын спорт түрлері конфедерациясының ресми сайты confederation.kz хабарлады. Күміс жүлде 100 кг.-да бақ сынаған Максим Раковқа бұйырды. Ол финалда жапон Кайхан Тахагимен белдесті. Бір ғана оңтайлы әдіс жасап, қарсыласын қапы қалдырған жапон палуаны құрлық чемпионы атанды. Ал қола медаль Гүлжан Исанова (+78 кг.) мен Ержан Шынкеевке (+100 кг.) бұйырды. Айта кетейік, алғашқы жарыс күні дзюдошыларымыз екі қола жүлдеге қол жеткізген болатын. Олар – Елдос Жұмақанов (66 кг.) пен Мариан Ордабаева (63 кг.). Еламан Қоңыр. Дерек, сурет: confederation.kz.