Хоккей. Әлем чемпионаты. Жартылай финалға шыққандар белгілі болды

АСТАНА. 15 мамыр. Чехияда өтіп жатқан хоккейден әлем чемпионатының жартылай финалына шыққан құрамалар белгілі болды. Бұл туралы egemen.kz хабарлады. Кеше ширек финалдық бәсекелер өтіп, нәтижесінде АҚШ, Канада, Ресей және Чехия құрамалары жарысты жалғастыруға мүмкіндік алды. Ширек финалдық ойындардың нәтижелері: 14 мамыр АҚШ – Швейцария 3:1 (0:1, 2:0, 1:0); Канада – Беларусь 9:0 (4:0, 2:0, 3:0); Швеция – Ресей 3:5 (0:2, 1:1, 2:2); Финляндия – Чехия 3:5 (1:1, 1:2, 1:2). Жартылай финалдық ойындар 16 мамырда өтеді. Бұл сында Канада Чехиямен күш сынасса, финалға берілер екінші жолдаманы АҚШ пен Ресей сарапқа салады. Бұл құрамалар топтық кезеңде бір-бірімен кездескен болатын. Сол кезде Канада Чехияны 6:3 есебімен жеңсе, АҚШ Ресейден 4:2 есебімен басым түскені есімізде. Әлем чемпионаты 17 мамырда аяқталатынын айта кетейік. Еламан Қоңыр. Дерек: egemen.kz. Сурет: championat.com.